ಲಂಡನ್, ಜುಲೈ 15: ಇಂಗ್ಲೆಂಡ್ ಹಾಗೂ ಆಸ್ಟ್ರೇಲಿಯಾ ನಡುವೆ ಆಷ್ಯಸ್ ಸರಣಿ ನಡೆಯುತ್ತಿರುವ ಸಂದರ್ಭದಲ್ಲೇ ಕೌಂಟಿ ಕ್ರಿಕೆಟ್ ನಲ್ಲಿ ಆಡುತ್ತಿದ್ದ ಆಸ್ಟ್ರೇಲಿಯಾದ ಆಲ್ ರೌಂಡರ್ ಮದ್ಯ ಸೇವಿಸಿ ವಾಹನ ಚಲಾಯಿಸಿದ ಆರೋಪದ ಮೇಲೆ ನಿಷೇಧಕ್ಕೆ ಒಳಗಾಗಿದ್ದಾರೆ.
ಆಸ್ಟ್ರೇಲಿಯಾದ ಎಡಗೈ ಬೌಲರ್ ಜೇಮ್ಸ್ ಫೌಲ್ಕನರ್ಗೆ ನಿಗದಿತ ಓವರ್ಗಳ 4 ಪಂದ್ಯಗಳಿಗೆ ನಿಷೇಧ ಹೇರಲಾಗಿದೆ. ಲಾಂಕ್ಶೈರ್ ತಂಡದ ಪರ ಆಡುತ್ತಿರುವ ಫೌಲ್ಕ್ನರ್ ಅವರು ಕೌಂಟಿ ಕ್ಲಬ್ ಕ್ರಿಕೆಟ್ ಪಂದ್ಯಗಳಲ್ಲಿ ಆಡುವಂತಿಲ್ಲ. [ಕುಡಿದು ವಾಹನ ಚಲಾವಣೆ, ಆಸೀಸ್ ಕ್ರಿಕೆಟರ್ ಜೇಮ್ಸ್ ಗೆ ಶಿಕ್ಷೆ]
ಕಳೆದ ವಾರ ಟಾಸ್ಮೇನಿಯಾ ಆಟಗಾರ ಟಿಮ್ ಪೈನ್ ಜತೆ ಮ್ಯಾಂಚೆಸ್ಟರ್ ನಗರದಲ್ಲಿ ಮದ್ಯ ಸೇವಿಸಿ ಕಾರು ಚಲಾಯಿಸಿದ್ದರು. ಇದಲ್ಲದೆ ಫೌಲ್ಕನರ್ ಅವರು ಕುಡಿದ ಮತ್ತಿನಲ್ಲಿ ಮುಂದಿದ್ದ ವಾಹನಕ್ಕೆ ಡಿಕ್ಕಿ ಹೊಡೆದಿದ್ದರು.
ಈ ಘಟನೆ ಬಗ್ಗೆ ಪರಿಶೀಲನೆ ನಡೆಸಿದ ಆಸ್ಟ್ರೇಲಿಯಾದ ಕ್ರಿಕೆಟ್ ಮಂಡಳಿ, ಶಿಸ್ತು ಪಾಲನೆ ಮಾಡದೇ ನಿಯಮ ಉಲ್ಲಂಘಿಸಿದ್ದಾರೆ ಎಂಬ ಕಾರಣಕ್ಕೆ 4 ಪಂದ್ಯಗಳಿಂದ ಅಮಾನತುಗೊಳಿಸಿದೆ. ಸೆಪ್ಟೆಂಬರ್ 5, 2015ರ ತನಕ ಯಾವುದೇ ಪಂದ್ಯವನ್ನಾಡುವಂತಿಲ್ಲ.
ಈ ಪ್ರಕರಣಕ್ಕೆ ಸಂಬಂಧಿಸಿದಂತೆ ಹೆಚ್ಚಿನ ವಿಚಾರಣೆಗೆ ಜುಲೈ 21ರಂದು ನ್ಯಾಯಾಲಯಕ್ಕೆ ಹಾಜರಾಗುವಂತೆ ಫೌಲ್ಕ್ನರ್ ಕೋರ್ಟ್ ಸೂಚಿಸಿದೆ.
ಮುಂಬರುವ ಐರ್ಲೆಂಡ್ ವಿರುದ್ಧದ ಸರಣಿ ಹಾಗೂ ಪ್ರವಾಸಿ ಇಂಗ್ಲೆಂಡ್ ವಿರುದ್ಧದ 5 ಪಂದ್ಯಗಳ ಸರಣಿಯ ಮೊದಲೆರಡು ಪಂದ್ಯಗಳಲ್ಲಿ ಆಡುವ ಅವಕಾಶವನ್ನು ಫೌಲ್ಕನರ್ ಕಳೆದುಕೊಂಡಿದ್ದಾರೆ ಎಂದು ಕ್ರಿಕೆಟ್ ಆಸ್ಟ್ರೇಲಿಯಾದ ಕಾರ್ಯಕಾರಿ ಪ್ರಧಾನ ಮ್ಯಾನೇಜರ್ ಪ್ಯಾಟ್ ಹೋವರ್ಡ್ ಅವರು ಹೇಳಿದ್ದಾರೆ.