ಸಿಡ್ನಿ, ಮಾರ್ಚ್ 31: ಈ ಹಿಂದೆ ಕೊಹ್ಲಿ ಜತೆ ಪಂದ್ಯವಾಡುತ್ತಿದ್ದಾಗ, ಮಾತಿನ ಚಕಮಕಿ ನಡೆದಿತ್ತು. ಆ ಸಂದರ್ಭದಲ್ಲಿ ವಿಕೆಟ್ ಕಿತ್ತು, ಕೊಹ್ಲಿಗೆ ತಿವಿಯೋಣ ಎನ್ನುವಷ್ಟು ರೋಷ ಉಕ್ಕಿ ಬಂದಿತ್ತು. ಆದರೆ, ಅಂಪೈರ್ ಅಡ್ಡ ಬಂದಿದ್ದರಿಂದ ಕೋಪ ನಿಯಂತ್ರಿಸಿಕೊಂಡೆ ಎಂದು ಆಸ್ಟ್ರೇಲಿಯಾದ ಮಾಜಿ ಆಟಗಾರ ಎಡ್ ಕೋವನ್ ಮಾರ್ಚ್ 31ರಂದು ಆಘಾತಕಾರಿ ಹೇಳಿಕೆ ನೀಡಿದ್ದಾರೆ.ಪ್ರವಾಸಿ ಆಸ್ಟ್ರೇಲಿಯಾ ವಿರುದ್ಧದ ನಾಲ್ಕು ಟೆಸ್ಟ್ ಪಂದ್ಯಗಳ ಸರಣಿಯನ್ನು ಭಾರತ 2-1 ಅಂತರದಿಂದ ಗೆದ್ದುಕೊಂಡಿದೆ. ಸರಣಿಯುದ್ದಕ್ಕೂ ಕೊಹ್ಲಿ ಪಡೆ ಹಾಗೂ ಸ್ಮಿತ್ ಪಡೆ ನಡುವೆ ವಾಕ್ಸಮರ ನಡೆದಿತ್ತು. ಮೈದಾನದ ಆಚೆಗೂ ಇದು ಹಬ್ಬಿದ್ದು, ಈಗಲೂ ಆಸ್ಟ್ರೇಲಿಯಾದ ಮಾಜಿ ಆಟಗಾರರು ಹೇಳಿಕೆ ನೀಡುವುದು ಕ್ಷಮೆಯಾಚಿಸುವುದು ಮುಂದುವರೆದಿದೆ.ಟೆಸ್ಟ್ ಪಂದ್ಯವೊಂದರ ವೇಳೆ ವಿರಾಟ್ ಕೊಹ್ಲಿ ನನ್ನ ಬಳಿ ಅನುಚಿತವಾಗಿ ವರ್ತಿಸಿದ್ದರು. ನನ್ನನ್ನು ನೋಡಿ ಗದರಿ, ಏನೋ ಒಂದು ಪದ ಬಳಸಿದ್ದರು, ಆದರೆ, ನನಗೆ ತಕ್ಷಣಕ್ಕೆ ಏನೆಂದು ಅರ್ಥವಾಗಿರಲಿಲ್ಲ. ಆದರೆ, ಕೊಹ್ಲಿ ಬಳಸಿದ್ದು ಅತ್ಯಂತ ಕೆಟ್ಟ ಪದ ಎಂದು ತಿಳಿದ ಮೇಲೆ ನನಗೆ ಕೋಪ ಉಕ್ಕಿ ಬಂತು, ವಿಕೆಟ್ ಕಿತ್ತುಕೊಂಡು ಕೊಹ್ಲಿಯನ್ನು ತಿವಿಯೋಣ ಎಂದು ಕೊಹ್ಲಿಯತ್ತ ಓಡಿದೆ. ಆದರೆ, ಅಂಪೈರ್ ಮಧ್ಯೆ ಬಂದಾಗ ನನ್ನ ಕೋಪವನ್ನು ನಿಯಂತ್ರಿಸಿಕೊಂಡೆ. ನಾನು ಕೂಡಾ ಕೊಹ್ಲಿ ಅಭಿಮಾನಿ . ಹೀಗಾಗಿ ನನ್ನ ಕೋಪ ಬೇಗನೇ ಕಂಟ್ರೋಲ್ ಮಾಡಿಕೊಂಡೆ ಎಂದು ಕೊವಾನ್ ಹೇಳಿದ್ದಾರೆ. ಆಸ್ಟ್ರೇಲಿಯಾ ಪರ 18 ಟೆಸ್ಟ್ ಪಂದ್ಯಗಳನ್ನಾಡಿ 1001 ರನ್ ಗಳಿಸಿರುವ ಕೋವನ್ ಅವರು ಸಂದರ್ಶನದ ವೇಳೆ ಈ ರೀತಿ ಹೇಳಿಕೆ ನೀಡಿದ್ದಾರೆ. ಭಾರತೀಯರ ಜತೆ ಆಡುವಾಗ ಭಾಷಾ ಸಮಸ್ಯೆ ಎದುರಿಸಬೇಕಾಗಿತ್ತು. ಇಂಗ್ಲೀಷ್ ಬಳಕೆ ಕಡಿಮೆ ಮಾಡಿ ಹಿಂದಿಯಲ್ಲಿ ನಮ್ಮ ಬಗ್ಗೆ ಏನಾದರೂ ಹೇಳುವಾಗ ಕುತೂಹಲ ಮೂಡುವುದು ಸಹಜ. ಆ ದಿನ ನನ್ನ ಮನಸ್ಥಿತಿ ಆ ರೀತಿ ಇತ್ತು ಅಷ್ಟೇ ಎಂದು ಕೋವನ್ ಹೇಳಿದ್ದಾರೆ.(ಪಿಟಿಐ)