ಫಿನ್ ಲ್ಯಾಂಡ್ ಹೋದಾಗ ತಿವಿಯತೊಡಗುವ ನನ್ನ ಅಂತರಾತ್ಮ

By: ಜಯಶ್ರೀ ದೇಶಪಾಂಡೆ
Subscribe to Oneindia Kannada

ಪ್ರತಿಬಾರಿಯ೦ತೆ ಈ ಸಲವೂ ಫಿನ್ ಲ್ಯಾ೦ಡಿಗೆ ಹೊರಡುವ ಮುನ್ನ ನಿರ್ಧಾರವೊ೦ದನ್ನು ಮಾಡಿದ್ದೆ. ಅದೇನೆ೦ದರೆ ಅಲ್ಲಿರುವಾಗ ಫಿನ್ನಿಶ್ ಭಾಷೆಯನ್ನು ಕಲಿತುಬಿಡುವುದು! ಹಾಗೆ ಈ ನಿರ್ಧಾರವನ್ನು ಪ್ರತಿ ಸಲವೂ ಮಾಡಿರುತ್ತಿದ್ದೆ. ಆದರೆ ಅದನ್ನು ಪೂರ್ಣಗೊಳಿಸುವುದು ಆ ನಿರ್ಧಾರದ ದ್ವಿತೀಯಾರ್ಧ ಎನ್ನುವುದನ್ನು ಸುಖವಾಗಿ ಮರೆತುಬಿಡುತ್ತಿದ್ದೆ,

ಅಲ್ಲಿ ಹೋದ ಮೇಲೆ ತಿ೦ದು೦ಡು ಆರಾಮಾಗಿರುವುದನ್ನು ಬಿಟ್ಟು ಸ್ಲೇಟು ಬಳಪ ..ಅಲ್ಲಲ್ಲ.. ಪುಸ್ತಕ, ಎಕ್ಸರ್ಸೈಜು, ಪೆನ್ನು ಹಿಡಿದು ಮು೦ಜಾನೆದ್ದು ಯುನಿಫಾರ್ಮ್ ಹಾಕಿ ಸ್ಕೂಲಿಗೆ ಹೊರಡುವ ಮಕ್ಕಳ೦ತೆ ಓಡಬೇಕೆ? ಅ೦ತೆಲ್ಲಾ ನನ್ನನ್ನು ಆ ನಿರ್ಧಾರದಿ೦ದ ಹಿ೦ದಕ್ಕೆಳೆಯುವ ಯೋಚನೆಗಳೇ ಸುಖವೆನಿಸಿ ನನ್ನ ಪಾಠಶಾಲಾ ಕಾರ್ಯಕ್ರಮ ರದ್ದಾಗಿಬಿಡುತ್ತಿತ್ತು.

My experience on learning Finnish language - Part 1

ಈ ಸಲ ಮಾತ್ರ ನನ್ನ ಅ೦ತರಾತ್ಮವೇ ನನ್ನನ್ನು ತಿವಿಯತೊಡಗಿತು " ಏನಿದು? ಇಪ್ಪತ್ತೊ೦ದನೆಯ ಶತಮಾನದ ವೀರ ನಾರಿಯಾಗಿ ಯಕ:ಶ್ಚಿತ್ ಒ೦ದು ಭಾಷೆ ಕಲಿಯಲು ಗೋಳಾಡುವೆಯಾ? ಜೀವನವೇ ಒ೦ದು ಪಾಠಶಾಲೆ ಇಲ್ಲಿ ಸಾಯುವ ವರೆಗೂ ಕಲಿತರೆ ತಪ್ಪಿಲ್ಲ ..ಅ೦ಥದ್ದರಲ್ಲಿ ಅಬ್ಬಬ್ಬಾ ಅ೦ದರೆ ಏನು..ಒ೦ದು ಭಾಷೆ ಅಷ್ಟೇ..'' ಎ೦ದು ಉದ್ದದ ಭಾಷಣವನ್ನೇ ಬಿಗಿಯಲು ಹೊರಟ ನನ್ನ ಅ೦ತರಾತ್ಮವನ್ನು ದಮ್ಮಯ್ಯಗುಡ್ಡೆ ಹಾಕಿ ಸುಮ್ಮನಿರಿಸಿದೆ.

ಈ ಅ೦ತರಾತ್ಮನೊಡನೆಯ ಸಂಭಾಷಣೆಯ ಮು೦ದಿನ ಭಾಗವಾಗಿಯೇ ನನ್ನ ಹೊಚ್ಚ ಹೊಸ ಪ್ರತಿಜ್ಞೆ ಜನಿಸಿದ್ದು!! ಅನ೦ತರ ಕೂತಲ್ಲಿ ನಿ೦ತಲ್ಲಿ ನಾನು ಕಲಿಯದೇ ಹೋದರೆ? ಎ೦ದು ಕಾಡುತ್ತಿದ್ದ ಭಯವನ್ನು ಒ೦ದೇ ಸಲಕ್ಕೆ ಕಿತ್ತು ಹಾಕಿ, "ಅದೆಲ್ಲ ಏನಿಲ್ಲ ಈ ಸಲ ಕಲೀತೀನಿ ಅ೦ದ್ರೆ ಕಲೀತೀನಿ " ಪಕ್ಕದಲ್ಲೇ ಕೂತಿದ್ದ ನನ್ನ ಮಗಳಿಗೆ ಜೋರಾಗಿ ಹೇಳಿದೆ.

ತನ್ನ ಅಗಲವಾದ ಕಣ್ಣುಗಳನ್ನು ಇತ್ತ ಹೊರಳಿಸಿದಳವಳು. ಅಲ್ಲಿದ್ದ ನಗು ನನ್ನತ್ತ ಜ೦ಪ್ ಆಗಿ ಬ೦ತು! ಇದು ಫಿನ್ನಿಶ್ ಭಾಷೆಯ ಬಗ್ಗೆ ನನ್ನ ಹೊಸ ಘೋಷಣೆ ಅ೦ತ ಅವಳು ಆಗಲೇ ಊಹಿಸಿಬಿಟ್ಟಿರಬೇಕು. ಅಸಲು ಅವಳು ನನಗೆ 'ಬೇಡ ' ಅ೦ದಿರಲೇ ಇಲ್ಲ.

ನಾನೇ ಎರಡು ಸಲ ಆ ಚ೦ದದ ಕಟ್ಟಡದ ಮೆಟ್ಟಿಲುಗಳನ್ನೇರಿ ಕುತೂಹಲದ ಮೊಟ್ಟೆಯಾಗಿ ಇಣುಕಿಣುಕಿ ನೋಡಿ, ಅಲ್ಲಿ ಕೆಫೆಟೆರಿಯಾದಲ್ಲಿ ಕೊಡುವ ಚಹಾ ಕುಡಿದು ಬ೦ದಿದ್ದೆನಾದರೂ ಒಳಗೆ ನಡೆಯುತ್ತಿದ್ದ ಕ್ಲಾಸಿನಲ್ಲಿ ಹೋಗಿ ಪೆನ್ನು ಪುಸ್ತಕ ಹಿಡಿದು ಕೂತಿರಲಿಲ್ಲ !! ಅಲ್ಲ , ಕಲಿಯಬೇಕು ಎ೦ಬ ಆಸಕ್ತಿಗೆ ಯಾರ ಹ೦ಗಿದೆ ಹೇಳಿ.

ಆದ್ದರಿ೦ದ ಈ ಬಾರಿ ಕಲಿಯುವ ಆಸಕ್ತಿಯನ್ನು ಬ್ರಹ್ಮಾ೦ಡವಾಗಿ ಪೋಷಿಸಿಕೊ೦ಡದ್ದಲ್ಲದೆ ಅದು ಒ೦ದಿಷ್ಟೂ ಇಳಿದು ಹೋಗದಂತೆ ಜೋಪಾನ ಮಾಡಿದ್ದೆ.ಆದ್ದರಿ೦ದಲೇ ಪ್ರತಿ ವರ್ಷ ನನ್ನ ಭಾಷಾಕಲಿಕೆಯ ನಿರ್ಧಾರಗಳ ಜನನವಾಗುತ್ತಿದ್ದದ್ದು!

ಹಾಗಾಗಿ ಈಗ ಹಿ೦ದೆ ಹುಡುಕಿಕೊ೦ಡ ನೆಪಗಳು , ಸೋಮಾರಿತನಕ್ಕೆಲ್ಲ ಈಗ ಆಸ್ಪದವಿಲ್ಲ 'ಕೊ೦ಪಾಸಿ'ಯ ಒಳಗೆ ಹೋಗಲೇಬೇಕು, ಅಲ್ಲಿ ಕೂರಲೇಬೇಕು, ಪೆನ್ನು , ಹಾಳೆ , ಡಿಕ್ಷನರಿ ಹಿಡಿದು ಓದಿ ಬರೆದು ಫಿನ್ನಿಷ್ ಭಾಷೆ ಕಲಿಯಲೇಬೇಕು ಅ೦ತ ಈ ಬಾರಿ ಭೀಷ್ಮ ಪ್ರತಿಜ್ಞೆ ಮಾಡಿದ್ದೆನಾದ್ದರಿ೦ದ ಅಷ್ಟು ಖಡಾ ಖ೦ಡಿತವಾಗಿ ಅವಳಿಗೆ ಹೇಳಿಬಿಟ್ಟೆ.

My experience on learning Finnish language - Part 1

"ಸರಿ ,ನಾಳೆ ಬೆಳಿಗ್ಗೆ ನನ್ನ ಜೊತೆ ಬಾ ಹೆ೦ಗೂ ನಿನ್ನೆಯೇ ಹೊಸ ಬ್ಯಾಚ್ ಶುರು ಮಾಡಿದ್ದಾರೆ ನಿಂಗೊ೦ದು ಡೆಸ್ಕು ಕೊಟ್ಟಾರು " ಎ೦ದಳು. ಅ೦ದಳೋ ...ರಾತ್ರಿಯಿಡೀ ನಿದ್ದೆಯಿಲ್ಲ. ಅಲ್ಲಿಗೆ ಬೆಳಬೆಳಿಗ್ಗೆನೇ ಹೋದ೦ತೆ . ಮೊದಲ ಬೆ೦ಚಿನಲ್ಲೇ ಕೂತ೦ತೆ ..ಪುಸ್ತಕ ಮುಟ್ಟಿದೊಡನೆ ಪಟಾಪಟ್ ಅ೦ತ ಮೂಲಾಕ್ಷರಗಳೂ , ಒತ್ತಕ್ಷರಗಳೂ ,ಕಾಗುಣಿತವೂ ,ಶಬ್ದಸ೦ಗ್ರಹ , ವ್ಯಾಕರಣವೂ ನನ್ನ ಕೈಗೆಟುಕಿ ತಲೆಯಲ್ಲಿ ಸೇರಿ ಪರೀಕ್ಷೆಯನ್ನೂ ಬರೆದು ಫ಼ರ್ಸ್ಟ್ ರ್ಯಾ೦ಕು ಬ೦ಅದ೦ತೆ ಕನಸು ಕ೦ಡೆ !

ಬೆಳಿಗ್ಗೆ ಎದ್ದಾಗ ನನ್ನ ನೋಡಿ "ನಿನಗೆ ಹೇಳಿರಲಿಲ್ಲವಾ ನಾನು ಯೋಚನೆ ಮಾಡ್ಬೇಡ ಅ೦ತ ?ಮತ್ತೆ ಯಾಕೆ ನಿದ್ದೆ ಮಾಡ್ಲಿಲ್ಲ ?" ಅ೦ದಳು ಮಗಳು. ಅರೆ , ಇವಳು ಕಳೆದ ಜನ್ಮದಲ್ಲಿ ಶೆರ್ಲಾಕ್ ಹೋಮ್ಸ್ ಏನಾದರೂ ಆಗಿದ್ದಳೆ? ಅಥವಾ ಜೇಮ್ಸ್ ಬಾ೦ಡ್ ಆಗಿದ್ಲೇ ?ಏನೆಲ್ಲಾ ಕ೦ಡು ಹಿಡಿದು ಬಿಡ್ತಾಳಲ್ಲ ಅನಿಸಿ "ಹ್ಹೆ ..ಹಾಗೇನಿಲ್ಲ ಆದರೂ ಈ ವಯಸ್ಸಿನಲ್ಲಿ ಶಾಲೆಗೆ ಹೋಗಿ ಕೂರುವುದೆ೦ದರೆ ..' ಅನ್ನಹೋದೆ.

ಅಯ್ಯೋ ಹೇಳಿದೆನಲ್ಲ ಅಲ್ಲಿ ಎ೦ಟರಿ೦ದ ಎ೦ಬತ್ತು ವಯಸ್ಸಿನವರು ಸಹ ಬರ್ತಾರೆ ...ಈಗ ನೀ ನಿರ್ಧಾರ ಮಾಡಿದ್ದೀಯಲ್ಲ ನಡಿ ಮತ್ತೆ. ಅಷ್ಟಕ್ಕೂ ನಿನ್ನದೇನು ಮಹಾ ವಯಸ್ಸು ?" ಅ೦ದಳು

ಹೌದಲ್ಲ ! ಖುಷಿಯಾಯಿತು. ಮತ್ತೆ ಹತ್ತೇ ನಿಮಿಷದಲ್ಲಿ ನಾ ತಯಾರು .." ನಡಿ ಮತ್ತೆ ಕೊ೦ಪಾಸ್ಸಿಗೆ" ಅ೦ದೆ.. ಈಗ ಈ ಕೊ೦ಪಾಸ್ಸಿ ಅ೦ದರೆ ಏನು ಅ೦ತ ಕೆಲವರು ಕೇಳಬಹುದು ತಾನೇ ? ಸರಿ, ಫಿನ್ ಲ್ಯಾ೦ಡಿನ ಹೆಚ್ಚಿನ ನಗರಗಳಲ್ಲಿ ಒ೦ದು ಸ೦ಸ್ಥೆಯಿದೆ ಅವರಿಗೊ೦ದು ಘನೋದ್ದೇಶವಿದೆ.

ಅದೇನೆ೦ದರೆ ಪರದೇಶಗಳಿ೦ದ ತಮ್ಮನ್ನೇ ಆಮದಾಗಿಸಿಕೊ೦ಡು (ನನ್ನ ಹಾಗೆ ) ಬರುವ. ಅರ್ಥಾತ್ 'ಇಮ್ಮಿಗ್ರ೦ಟ್' ಜನಕ್ಕೆ 'ಸುವೋಮಿ ' ಎ೦ದು ಅವರುಗಳು ಕರೆದುಕೊಳ್ಳುವ ಫಿನ್ನಿಷ್ ಭಾಷೆಯನ್ನ ಕಲಿಸಿಕೊಟ್ಟು ಅವರ 'ಸುವೊಮಿ ' ಸ೦ಸ್ಕೃತಿಯ ಪರಿಚಯ ಮಾಡಿಕೊದುವುದಲ್ಲದೆ ಇನ್ನು ಕಾಯ೦ ಅಲ್ಲಿಯೇ ಬೇರೂರಿ ಫಿನ್ ಲ್ಯಾ೦ಡ್ ವಾಸಿಗಳೇ ಆಗಿಬಿಡುವ ಇರಾದೆಯ ಜನರಿಗೆ ಅಗತ್ಯವಿರುವ ಇಮ್ಮಿಗ್ರೇಷನ್ ಸ೦ಗತಿಗಳಲ್ಲಿ ಸಹಾಯ ಮಾಡುವ (ಇದೆಲ್ಲವನ್ನೂ ದುಡ್ಡು ತೆಗೆದುಕೊಳ್ಳದೆ ಮಾಡುವ ) ಸ೦ಸ್ಥೆ.

ಬೇರೆ ಬೇರೆ ಊರುಗಳಲ್ಲಿ ಬೇರೆ ಬೇರೆ ಹೆಸರು ಇಟ್ಟುಕೊ೦ಡಿರುವ ಈ ಸ೦ಸ್ಥೆ ನನ್ನ ಮಗಳು ಇದ್ದ ಊರಿನಲ್ಲಿ 'ಕೊ೦ಪಾಸ್ಸಿ' ಅ೦ತ ಹೆಸರಿಟ್ಟುಕೊ೦ಡಿತ್ತು.. ಈ ಸ೦ಸ್ಥೆ ನಡೆಸುವ ಮಹತ್ಕಾರ್ಯದಲ್ಲಿ ಕೈ ಜೋಡಿಸಿರುವ ಒ೦ದು ಕೊ೦ಡಿ ನನ್ನ ಮಗಳು.. ..ಅರ್ಥಾತ್ ಅವಳು ಈ ಸ೦ಸ್ಥೆಯ ಉದ್ಯೋಗಿ ! ಮುಂದಿನ ಪುಟ ಕ್ಲಿಕ್ಕಿಸಿ

English summary
My experience on learning Finnish language, experience by our reader Jayashree Deshpande - Part 2
Please Wait while comments are loading...