ಮಹಿಳೆ ಮೇಲೆ ಹಲ್ಲೆ, ನಟ ನವಾಜುದ್ದೀನ್ ಸಿದ್ದಿಕಿ ಮೇಲೆ ಕೇಸ್
ಮುಂಬೈ, ಜ. 18: ಪ್ರತಿಭಾವಂತ ನಟ ನವಾಜುದ್ದೀನ್ ಸಿದ್ದಿಕಿ ಅವರ ಮೇಲೆ ಮಹಿಳೆಯೊಬ್ಬರಿಗೆ ಹಲ್ಲೆ ಮಾಡಿದ ಆರೋಪ ಮಾಡಲಾಗಿದೆ. ಈ ಕುರಿತಂತೆ ಪ್ರಕರಣ ದಾಖಲಿಸಲಾಗಿದ್ದು, ಎಫ್ ಐಆರ್ ಹಾಕಲಾಗಿದೆ.
ಕಾರು ಪಾರ್ಕಿಂಗ್ ತಾಣದಲ್ಲಿ ಮಹಿಳೆಯೊಂದಿಗೆ ಅನುಚಿತ ವರ್ತನೆ, ಹಲ್ಲೆ ಆರೋಪ ಎದುರಿಸುತ್ತಿದ್ದಾರೆ. ಆದರೆ, ಇಂಥ ಘಟನೆ ಏನೂ ನಡೆದಿಲ್ಲ. ಸುಮ್ಮನೆ ಚಿಕ್ಕ ವಿಷಯವನ್ನು ದೊಡ್ಡದ್ದು ಮಾಡಬೇಡಿ ಎಂದು ಸಿದ್ದಿಕಿ ಅವರ ಮ್ಯಾನೇಜರ್ ಅನೂಪ್ ಪಾಂಡೆ ಅವರು ಮಾಧ್ಯಮಗಳ ವರದಿಯನ್ನು ಅಲ್ಲಗೆಳೆದಿದ್ದಾರೆ.
ಘಟನೆ ವಿವರ: ದ್ವಿಚಕ್ರ ವಾಹನ ನಿಲುಗಡೆ ಇರುವ ಕಡೆ ಕಾರು ನಿಲ್ಲಿಸಿದ್ದನ್ನು 24 ವರ್ಷ ವಯಸ್ಸಿನ ಮಹಿಳೆ ಪ್ರಶ್ನಿಸಿದ್ದಾರೆ. ಇದರಿಂದ ಸಿದ್ದಿಕಿ ಹಾಗೂ ಮಹಿಳೆ ನಡುವೆ ಮಾತಿನ ಚಕಮಕಿ ನಡೆದಿದೆ.
ಆದರೆ, ದೂರು ನೀಡಿರುವ ಮಹಿಳೆ ಹೇಳಿದಂತೆ ಹಲ್ಲೆ ಮಾಡೀಲ್ಲ ಎಂದು ಪಾಂಡೆ ಸ್ಪಷ್ಟಪಡಿಸಿದ್ದಾರೆ. ತನಿಖೆ ಮಾಡದೆ ದೂರು ದಾಖಲಿಸಿಕೊಂಡು ಎಫ್ಐಆರ್ ಹಾಕಲಾಗಿದೆ.
ದೂರಿನ ಪ್ರಕಾರ ಸಿದ್ದಿಕಿ ಅವರು ಮಹಿಳೆಗೆ ಕಪಾಳಮೋಕ್ಷ ಮಾಡಿದ್ದಾರೆ. ಅಂಧೇರಿಯ ಸಬ್ ಅರ್ಬನ್ ಪ್ರದೇಶದ ಯಾರಿ ರಸ್ತೆಯಲ್ಲಿ ಕುಟುಂಬದೊಡನೆ ನೆಲೆಸಿರುವ ಸಿದ್ದಿಕಿ ಅವರ ಜೊತೆ ಈ ಹಿಂದೆ ಕೂಡಾ ಪಾರ್ಕಿಂಗ್ ವಿಷಯಕ್ಕೆ ಜಗಳವಾಡಿದ ವರದಿಗಳಿವೆ. ಆದರೆ, ಈ ಬಾರಿ ಸಿದ್ದಿಕಿ ವಿರುದ್ಧ ಐಪಿಸಿ ಸೆಕ್ಷನ್ 354 ಅನ್ವಯ ಪ್ರಕರಣ ದಾಖಲಿಸಿಕೊಂಡಿದೆ.
(ಒನ್ ಇಂಡಿಯಾ ಸುದ್ದಿ)