ಜೀನ್ಸ್ ತೊಟ್ಟು ಆಕರ್ಷಿಸುವ ಮಹಿಳೆಯರನ್ನು ಸಮುದ್ರಕ್ಕೆ ಎಸೆಯಬೇಕು
ಜೀನ್ಸ್, ಟಿ-ಶರ್ಟ್ ತೊಟ್ಟು ಪುರುಷರನ್ನು ಆಕರ್ಷಿಸುವಂತಹ ಮಹಿಳೆಯರನ್ನು ಸಮುದ್ರಕ್ಕೆ ಎಸೆಯಬೇಕೆಂದು ಪಾದ್ರಿಯೊಬ್ಬರು ಹೇಳಿಕೆ ನೀಡಿದ್ದಾರೆ.
ತಿರುವನಂತಪುರಂ, ಮಾ 1: ಜೀನ್ಸ್, ಟಿ-ಶರ್ಟ್ ತೊಟ್ಟು ಪುರುಷರನ್ನು ಆಕರ್ಷಿಸುವಂತಹ ಮಹಿಳೆಯರನ್ನು ಸಮುದ್ರಕ್ಕೆ ಎಸೆಯಬೇಕೆಂದು ಪಾದ್ರಿಯೊಬ್ಬರು ವಿವಾದಕಾರಿ ಹೇಳಿಕೆ ನೀಡಿದ್ದಾರೆ.
ಅರೆನಗ್ನ ಬಟ್ಟೆ ಧರಿಸುವ ಮಹಿಳೆಯರನ್ನೂ ಸಮುದ್ರದಲ್ಲಿ ಮುಳುಗಿಸಬೇಕೆಂದು ಪಾದ್ರಿ ನೀಡಿರುವ ಹೇಳಿಕೆಯ ವಿಡಿಯೋವನ್ನು ಕೇರಳದ ಶಾಲೋಮ್ ಟಿವಿ ತನ್ನ ಫೇಸ್ ಬುಕ್ ಟೈಂಲೈನಿನಲ್ಲಿ ಪ್ರಕಟಿಸಿದೆ.
ಮಲಯಾಳಂ ಭಾಷೆಯಲ್ಲಿರುವ ಈ ವಿಡಿಯೋ ತುಣುಕು ಹನ್ನೊಂದು ತಿಂಗಳ ಹಿಂದೆ ಯುಟ್ಯೂಬ್ ನಲ್ಲಿ ಪ್ರಸಾರವಾಗಿದ್ದರೂ, ಫೆಬ್ರವರಿ 25ರಂದು ಶಾಲೋಮ್ ಟಿವಿ ಈ ವಿಡಿಯೋ ಮರುಬಿತ್ತರಿಸಿದ ನಂತರ ಈ ವಿಡಿಯೋ ಈಗ ವೈರಲ್ ಆಗಿದೆ.
ಪವಿತ್ರ ದಿನದಂದು ಪ್ರಾರ್ಥನೆಗೆಂದು ಚರ್ಚಿಗೆ ಹೋದಾಗ ಕೆಲವು ಮಹಿಳೆಯರು ಧರಿಸುವ ಬಟ್ಟೆಯನ್ನು ನೋಡಿದಾಗ, ಅಂತವರನ್ನು ಚರ್ಚಿನಿಂದ ಹೊರಗಟ್ಟಬೇಕು ಎನ್ನುವಷ್ಟು ಸಿಟ್ಟು ಬರುತ್ತದೆ ಎಂದು ಪಾದ್ರಿ ಹೇಳಿದ್ದಾರೆ.
ಚರ್ಚಿಗೆ ಬರುವ ಕೆಲವು ಮಹಿಳೆಯರು ಜೀನ್ಸ್, ಟಿ-ಶರ್ಟ್ ಧರಿಸಿ ಕೈಯಲ್ಲೊಂದು ಮೊಬೈಲ್ ಇಟ್ಟುಕೊಂಡು, ತಲೆಯನ್ನೂ ಬಾಚಿಕೊಳ್ಳದೇ ಬರುತ್ತಾರೆ. ಅವರಿಗೆ ಚರ್ಚಿಗೆ ಹೇಗೆ ಬರಬೇಕೆನ್ನುವ ಕನಿಷ್ಠ ಜ್ಞಾನವೂ ಇರುವುದಿಲ್ಲ ಎಂದು ಪಾದ್ರಿ ನೀಡಿರುವ ಹೇಳಿಕೆ ವಿಡಿಯೋದಲ್ಲಿದೆ.
ಕ್ಯಾಥೋಲಿಕ್ ಚರ್ಚ್ ಅಥವಾ ಬೈಬಲ್ ನಲ್ಲಿ ಪುರುಷರು ತೊಟ್ಟಂತೇ ಮಹಿಳೆಯರೂ ಬಟ್ಟೆಗಳನ್ನು ಧರಿಸಬಹುದೆಂದು ಎಲ್ಲಾದರೂ ಉಲ್ಲೇಖಿಸಲಾಗಿದೆಯಾ ಎಂದು ಪ್ರಶ್ನಿಸಿರುವ ಪಾದ್ರಿ, ಮಹಿಳೆಯರು ಧರಿಸುವ ಬಟ್ಟೆಯನ್ನು ಪುರುಷರು ಮತ್ತು ಪುರುಷರು ಧರಿಸುವ ಬಟ್ಟೆಯನ್ನು ಮಹಿಳೆಯರು ಧರಿಸಬಾರದೆಂದು ಹೇಳಿದ್ದಾರೆ.