ಶೀಘ್ರದಲ್ಲೇ ಸೈಡಿಗೆ ಸರಿಯಲಿವೆ 2 ಸಾವಿರ ರುಪಾಯಿ ನೋಟು?
ನವದೆಹಲಿ, ಜುಲೈ 26: ಎರಡು ಸಾವಿರ ರುಪಾಯಿ ನೋಟುಗಳ ವಿತರಣೆಯನ್ನು ಸರಕಾರ ಸದ್ಯದಲ್ಲೇ ನಿಲ್ಲಿಸುವ ಸಾಧ್ಯತೆ ಇದೆ. ವರದಿಗಳ ಪ್ರಕಾರ, ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾ ಎರಡು ಸಾವಿರ ರುಪಾಯಿ ನೋಟುಗಳ ಮುದ್ರಣವನ್ನು ನಿಲ್ಲಿಸಿದೆ. ಈ ನೋಟನ್ನು ಕಳೆದ ವರ್ಷ ನವೆಂಬರ್ ನಲ್ಲಿ ಪರಿಚಯಿಸಲಾಗಿತ್ತು.
ಸದ್ಯದಲ್ಲೇ ಬರಲಿದೆ 200 ರೂಪಾಯಿಯ ಹೊಸ ನೋಟು
ಇದೀಗ ಈ ನೋಟಿನ ಬದಲಿಗೆ ಇನ್ನೂರು ರುಪಾಯಿ ಸೇರಿದಂತೆ ಉಳಿದ ಮುಖಬೆಲೆಯ ನೋಟುಗಳ ಮುದ್ರಣವನ್ನು ರಿಸರ್ವ್ ಬ್ಯಾಂಕ್ ಹೆಚ್ಚಿಸಿದೆ. ಸದ್ಯಕ್ಕೆ ಇನ್ನೂರು ರುಪಾಯಿ ನೋಟುಗಳ ಮುದ್ರಣ ನಡೆಯುತ್ತಿದ್ದು, ಶೀಘ್ರದಲ್ಲೇ ಚಾಲ್ತಿಗೆ ಬರಲಿದೆ.
'ಮಿಂಟ್'ನಲ್ಲಿ ವರದಿಯೊಂದು ಪ್ರಕಟವಾಗಿದೆ. ಅದರಲ್ಲಿ ರಿಸರ್ವ್ ಬ್ಯಾಂಕ್ ನ ಮೂಲಗಳನ್ನು ಉದಾಹರಿಸಿದ್ದು, ಮೂನ್ನೂರಾ ಎಪ್ಪತ್ತು ಕೋಟಿಯಷ್ಟು ಎರಡು ಸಾವಿರ ರುಪಾಯಿ ನೋಟು ಮುದ್ರಿಸಲಾಗಿದೆ. ಅಂದರೆ ಆ ಮೊತ್ತ 7.4 ಲಕ್ಷ ಕೋಟಿ ರುಪಾಯಿ ಆಗುತ್ತದೆ. ಅಂದರೆ ಈ ಹಿಂದೆ ಆರುನೂರಾ ಮೂವತ್ತು ಕೋಟಿ ಒಂದು ಸಾವಿರ ರುಪಾಯಿ ನೋಟು ಚಾಲ್ತಿಯಲ್ಲಿತ್ತು.
ಅದರ ಅಪನಗದೀಕರಣ ಆಗಿತ್ತು. ಆ ಪೈಕಿ ಮುದ್ರಣವಾದ ಶೇ ತೊಂಬತ್ತರಷ್ಟು ನೋಟುಗಳು ಹೊಸ ಐನೂರು ರುಪಾಯಿ ಮುಖಬೆಲೆಯವು. ಈ ವರೆಗೆ ಸಾವಿರದ ನಾನೂರು ಕೋಟಿ ಹೊಸ ನೋಟುಗಳು ಮುದ್ರಣವಾಗಿವೆ. ಈ ಹಿಂದೆ ಚಲಾವಣೆಯಲ್ಲಿದ್ದ ಸಾವಿರದ ಐನೂರಾ ಎಪ್ಪತ್ತು ಕೋಟಿ ಐನೂರು ರುಪಾಯಿ ನೋಟುಗಳನ್ನು ಹಿಂಪಡೆಯಲಾಗಿತ್ತು.
ಅಂದಹಾಗೆ, ಇಲ್ಲಿ ಕೊಟ್ಟಿರುವುದೆಲ್ಲ ನೋಟುಗಳ ಸಂಖ್ಯೆ. ಮೌಲ್ಯವನ್ನಲ್ಲ ಎಂಬುದು ಗಮನದಲ್ಲಿರಲಿ.