ಮೋದಿ ಪಿಎಂ ಆದ ನಂತರ ಹಾಕಿದ ರಜೆ ಎಷ್ಟು, ಆರ್ಟಿಐನಲ್ಲಿ ಬಹಿರಂಗ

ನವದೆಹಲಿ, ಅ 12: ಪ್ರಧಾನಮಂತ್ರಿ ಮತ್ತು ಕ್ಯಾಬಿನೆಟ್ ಸೆಕ್ರೆಟರಿಗೆ ಇರುವ 'ಲೀವ್ ಪಾಲಿಸಿ' ಏನು, ಅವರು ಇದುವರೆಗೆ ಹಾಕಿರುವ ರಜೆ ಎಷ್ಟು ಎನ್ನುವ ಆರ್ಟಿಐ ಮುಖಾಂತರ ಬಂದ ಅರ್ಜಿಯೊಂದಕ್ಕೆ ಪ್ರಧಾನಮಂತ್ರಿ ಕಾರ್ಯಾಲಯ ಉತ್ತರಿಸಿದೆ.

ಪ್ರಧಾನಮಂತ್ರಿ ಕಾರ್ಯಾಲಯ ನೀಡಿದ ಮಾಹಿತಿ ಎಲ್ಲರನ್ನೂ ಹುಬ್ಬೇರಿಸುವುಂತೆ ಮಾಡಿದೆ. ಪ್ರಧಾನಿ ಮೋದಿ ಈ ರೀತಿ ಕೆಲಸ ಮಾಡುತ್ತಿದ್ದಾರಾ.. ಶಿವನೇ ಎನ್ನುವಂತೆ ಮೂಗಿನ ಮೇಲೆ ಬೆರಳಿಡುವಂತೆ ಮಾಡಿದೆ.

ಅಧಿಕಾರಕ್ಕೆ ಬಂದ ದಿನದಿಂದ ಇಂದಿನವರೆಗೆ (ಅ 5ಕ್ಕೆ ಅನ್ವಯವಾಗುವಂತೆ) ಒಂದು ದಿನವೂ ರಜೆ ಹಾಕದೇ ನಮ್ಮ ಪ್ರಧಾನಮಂತ್ರಿಗಳು ಕೆಲಸ ಮಾಡಿದ್ದಾರೆ.

ಅಂದರೆ ಒಟ್ಟಾರೆಯಾಗಿ 860 (ಪಿಎಂ ಆಗಿ ಅಧಿಕಾರ ಸ್ವೀಕರಿಸಿದ್ದು 26.05.2014ರಲ್ಲಿ) ದಿನ ಪ್ರಧಾನಿಗಳು ಸತತವಾಗಿ ಕೆಲಸ ಮಾಡಿದ್ದಾರೆ. ಆರ್ಟಿಐ ಅರ್ಜಿಗೆ ಉತ್ತರಿಸುತ್ತಾ ಪ್ರಧಾನಮಂತ್ರಿ ಕಾರ್ಯಾಲಯ ಈ ಮಾಹಿತಿ ನೀಡಿದೆ.

ಅರ್ಜಿದಾರ ಮೋದಿ ಜೊತೆ ಹಿಂದಿನ ಪ್ರಧಾನಿಗಳಾದ ವಾಜಪೇಯಿ, ಮನಮೋಹನ್ ಸಿಂಗ್, ದೇವೇಗೌಡ, ಐ ಕೆ ಗುಜ್ರಾಲ್, ಪಿ ವಿ ನರಸಿಂಹ ರಾವ್, ವಿ ಪಿ ಸಿಂಗ್, ಚಂದ್ರಶೇಖರ್ ಮತ್ತು ರಾಜೀವ್ ಗಾಂಧಿಯವರ ಬಗ್ಗೆಯೂ ಮಾಹಿತಿಯನ್ನು ಕೇಳಿದ್ದರು.

ಹಿಂದಿನ ಪ್ರಧಾನಿಗಳ ರೆಕಾರ್ಡ್ಸ್ ನಮ್ಮಲಿಲ್ಲ ಎಂದು ಪಿಎಂಓ, ಹಾಲೀ ಪ್ರಧಾನಿಯವರ ಮಾಹಿತಿಯನ್ನು ಮಾತ್ರ ನೀಡಿದೆ.

ಕೊನೇ ಮಾತು: ಪ್ರಧಾನಮಂತ್ರಿ ಕಾರ್ಯಶೈಲಿಯಿಂದ ಪ್ರೇರಣೆಗೊಂಡು, ಎಲ್ಲರೂ ಮೋದಿಯಂತೆ ರಜೆ ಹಾಕದೇ ಕೆಲಸ ಮಾಡಿ ಎಂದು ಅವರವರ ಸಂಸ್ಥೆಯ ಯಜಮಾನ ಫರ್ಮಾನು ಹೊರಡಿಸಿದರೆ? ಕಷ್ಟ.. ಕಷ್ಟ..

English summary

No holiday for Narendra Modi: Prime Minister of India is always on duty, PMO's response to RTI applicant.