ಹುಬ್ಬಳ್ಳಿ: 10 ರು. ನಾಣ್ಯ ಆಯ್ತು, ಈಗ 5 ರು ನೋಟು ರದ್ದು ವದಂತಿ
ಹುಬ್ಬಳ್ಳಿ, ಫೆಬ್ರವರಿ, 14 : ಇತ್ತೀಚೆಗಷ್ಟೇ 10 ರೂ. ಮೌಲ್ಯದ ನಾಣ್ಯವನ್ನು ಚಲಾವಣೆಯಾಗುವುದಿಲ್ಲ ಎಂಬ ವದಂತಿ ನಗರದಾದ್ಯಂತ ಹಬ್ಬಿದ ಸುದ್ದಿ ತಣ್ಣಗಾಗುವ ಹೊತ್ತಿಗೆ ಈಗ ಐದು ರೂಪಾಯಿಯ ನೋಟು ಚಲಾವಣೆ ಇಲ್ಲ ಎಂಬ ವದಂತಿ ಹಬ್ಬಿದೆ.
ಭಾರತೀಯ ರಿಸರ್ವ್ ಬ್ಯಾಂಕ್ ಈ ವರೆಗೆ 5 ರು. ನೋಟು ರದ್ದತಿ ಬಗ್ಗೆ ಯಾವುದೇ ಆದೇಶ ಹೊರಡಿಸಿಲ್ಲ. ಆದರೂ ಹುಬ್ಬಳ್ಳಿಯ ಹಲವು ಅಂಗಡಿಗಳಲ್ಲಿ ಈ ಐದು ರುಪಾಯಿ ನೋಟುಗಳನ್ನು ಸ್ವೀರಿಸುತ್ತಿಲ್ಲ.
ಹೌದು. ಹಲವು ಕಿರಾಣಿ ಅಂಗಡಿಗಳಲ್ಲಿ,ಚಿಕ್ಕಪುಟ್ಟ ರಸ್ತೆ ಪಕ್ಕದ ಡಬ್ಬಾ ಅಂಗಡಿಗಳಲ್ಲಿ ಮತ್ತು ಕೆಲವೊಂದು ಹೊಟೇಲ್ ಗಳಲ್ಲಿ ಐದು ರು. ನೋಟುಗಳನ್ನು ತೆಗೆದುಕೊಳ್ಳುತ್ತಿಲ್ಲ. [ಹುಬ್ಬಳ್ಳಿಯಲ್ಲಿ 10 ರೂ. ನಾಣ್ಯ ವದಂತಿ ಬಗ್ಗೆ ಬ್ಯಾಂಕ್ ಸ್ಪಷ್ಟನೆ]
ಕಾರಣ ಕೇಳಿದರೆ ಇಲ್ಲಾರೀ ನೋಟು ನಡೆಯೋಲ್ಲ ಬೇಕಿದ್ದರೆ ಐದು ರು. ನಾಣ್ಯ ಕೊಡಿ ತೆಗೆದುಕೊಳ್ಳುತ್ತೇವೆ ಎಂದು ವ್ಯಾಪಾರಸ್ಥರು ಹೇಳುತ್ತಿದ್ದಾರೆ.
ಈ 5 ರು. ನೋಟಿನ ವದಂತಿಯಿಂದಾಗಿ ಸಣ್ಣ-ಪುಟ್ಟ ವ್ಯಾಪಾರ ಮಾಡಿಕೊಂಡು ಜೇವನ ಮಾಡುವವರಿಗೆ ನುಂಗಲಾರದ ತುತ್ತಾಗಿ ಪರಿಣಮಿಸಿದೆ.
ಈ ಬಗ್ಗೆ ಮಾಹಿತಿ ನೀಡುವ ಐಡಿಬಿಐ ಬ್ಯಾಂಕ್ ಮ್ಯಾನೇಜರ್ ರಾಜಾರಾಮ, ಇಂಥಹ ಸುದ್ದಿಗಳನ್ನು ಯಾರೋ ಕಿಡಿಗೇಡಿಗಳು ಹಬ್ಬಿಸುತ್ತಿದ್ದಾರೆ. ಜನರು ಈ ಬಗ್ಗೆ ಗಮನ ಕೊಡದೇ ಧೈರ್ಯವಾಗಿ ಐದು ರೂ. ನೋಟು ಬಳಸಬಹುದು ಎಂದಿದ್ದಾರೆ.