ವಿಪ್ರೋ ಕಂಪನಿಗೆ ಮತ್ತೊಮ್ಮೆ 500 ಕೋಟಿ ರು ಬೆದರಿಕೆ ಇಮೇಲ್
ಪ್ರತಿಷ್ಠಿತ ಐಟಿ ಕಂಪನಿ, ಬೆಂಗಳೂರು ಮೂಲದ ವಿಪ್ರೋಗೆ ಅಜ್ಞಾತರಿಂದ ಮತ್ತೊಮ್ಮೆ ಬೆದರಿಕೆ ಇ-ಮೇಲ್ ಬಂದಿದೆ. ಬಿಟ್ ಕಾಯಿನ್ ಮೂಲಕ 500 ಕೋಟಿ ರು. ನೀಡಬೇಕೆಂದು ಒತ್ತಾಯಿಸಲಾಗಿದೆ.
ಬೆಂಗಳೂರು, ಜೂನ್ 02: ಬೆಂಗಳೂರು ಮೂಲದ ಪ್ರತಿಷ್ಠಿತ ಐಟಿ ಕಂಪನಿ ವಿಪ್ರೋಗೆ ಅಜ್ಞಾತರಿಂದ ಮತ್ತೊಮ್ಮೆ ಬೆದರಿಕೆ ಇ-ಮೇಲ್ ಬಂದಿದೆ. ಬಿಟ್ ಕಾಯಿನ್ ಮೂಲಕ 500 ಕೋಟಿ ರು. ನೀಡಬೇಕೆಂದು ಒತ್ತಾಯಿಸಲಾಗಿದೆ.
ಡಿಜಿಟಲ್ ವ್ಯವಹಾರಗಳಿಗಾಗಿ ಬಳಸುವ ಹಣದ ವ್ಯವಸ್ಥೆ ಬಿಟ್ ಕಾಯಿನ್ ಮೂಲಕ ಹಣ ವರ್ಗಾಯಿಸುವಂತೆ ಇಮೇಲ್ ನಲ್ಲಿ ಬರೆಯಲಾಗಿದೆ. ಈ ಹಿಂದೆ ಬಂದಿದ್ದ ಇದೇ ರೀತಿ ಇಮೇಲ್ ನಲ್ಲಿ ಮೇ 25ರ ಗಡುವು ನೀಡಲಾಗಿತ್ತು. ಬೆಂಗಳೂರಿನಲ್ಲಿರುವ ಎಲ್ಲಾ ವಿಪ್ರೋ ಕಂಪನಿಗಳ ಮೇಲೆ ದಾಳಿ ನಡೆಸುವುದಾಗಿ ಬೆದರಿಕೆ ಹಾಕಲಾಗಿತ್ತು. ಈ ಬಾರಿ 72 ಗಂಟೆಗಳ ಗಡುವು ನೀಡಲಾಗಿದೆ.
ಎರಡು ಬಾರಿಯೂ [email protected] ಎಂಬ ಐಡಿಯಿಂದ ಇಮೇಲ್ ಬಂದಿದೆ. ಐಪಿ ಟ್ರ್ಯಾಕ್ ಮಾಡಿದರೆ ಸ್ವಿಟ್ಜರ್ಲೆಂಡ್ ಎಂದು ತೋರಿಸುತ್ತಿದೆ.
ಪ್ರಕರಣ ದಾಖಲಿಸಿಕೊಂಡಿರುವ ಎಲೆಕ್ಟ್ರಾನಿಕ್ ಸಿಟಿ ಪೊಲೀಸರು, ಸಿಐಡಿ ಸೈಬರ್ ಐಟಿ ವಿಂಗ್ ನ ನೆರವು ಕೋರಿದ್ದಾರೆ. ಎರಡನೇ ಬಾರಿಗೆ ಬೆದರಿಕೆ ಬಂದಿರುವುದರಿಂದ ಈಗ ಇಂಟರ್ ಪೋಲ್ ನೆರವು ಪಡೆದು ಇಮೇಲ್ ಕಳಿಸಿದ ವ್ಯಕ್ತಿ ಹಾಗೂ ಸ್ಥಳವನ್ನು ಗುರುತಿಸುವ ಯತ್ನ ಮಾಡಲಾಗುವುದು ಎಂದು ತನಿಖಾಧಿಕಾರಿ ಹೇಳಿದ್ದಾರೆ.
ಮಾರುಕಟ್ಟೆಯಲ್ಲಿ ಚಲಾವಣೆಯಲ್ಲಿ ಇರುವ ಕರೆನ್ಸಿಗಳಿಗೆ (ಡಾಲರ್, ಪೌಂಡ್ , ರೂಪಾಯಿ) ಪರ್ಯಾಯವಾಗಿ ಡಿಜಿಟಲ್ ರೂಪದಲ್ಲಿ ಇರುವ ಮತ್ತು ಇಂಟರ್ನೆಟ್ನಲ್ಲಿ ಮಾತ್ರ ವಹಿವಾಟು ನಡೆಸಬಹುದಾದ ಕರೆನ್ಸಿಯಾಗಿದೆ. ಎಲ್ಲವೂ ಅಂತರ್ಜಾಲದಲ್ಲೇ ವ್ಯವಹಾರ ನಡೆಯುತ್ತದೆ. ಬಿಟ್ ಕಾಯಿನ್ ಪೂರೈಸುವ ಕಂಪನಿಗೆ ಹಣ ನೀಡಿದರೆ ಆ ಕಂಪನಿಗಳು ಗ್ರಾಹಕನಿಗೆ ಅದರ ಮೌಲ್ಯದ ಕಾಯಿನ್ (ಡಿಜಿಟಲ್ ಮಾದರಿಯ) ನೀಡುತ್ತವೆ.