ಆರ್ ಟಿಇ ಮಕ್ಕಳಿಗೆ ಪ್ರತ್ಯೇಕ ಕೊಠಡಿಯಲ್ಲಿ ಪಾಠ: ಪೋಷಕರ ಪ್ರತಿಭಟನೆ
ಆರ್ ಟಿಐ ಮಕ್ಕಳಿಗೆ ಪ್ರತ್ಯೇಕ ಕೊಠಡಿ ನೀಡಿದ ಬೆಂಗಳೂರಿನ ಜೆಪಿ ನಗರದ ಬ್ರಿಗೇಡ್ ಶಾಲೆ ವಿರುದ್ಧ ಪೋಷಕರ ಪ್ರತಿಭಟನೆ. ಮಕ್ಕಳಲ್ಲಿ ತಾರತಮ್ಯ ತುಂಬುವ ಯತ್ನದ ವಿರುದ್ಧ ಕಿಡಿ. ಪೋಷಕರ ಆರೋಪ ನಿರಾಕರಿಸಿದ ಶಾಲಾ ಆಡಳಿತ ಮಂಡಳಿ.
ಬೆಂಗಳೂರು, ಜೂ. 21: ಶಿಕ್ಷಣ ಹಕ್ಕು ಕಾಯ್ದೆಯಡಿ ಸೀಟು ಪಡೆದಿರುವ ವಿದ್ಯಾರ್ಥಿಗಳನ್ನು ಶಾಲೆಯೊಂದರ ಆಡಳಿತ ಮಂಡಳಿಯು ಬೇರೊಂದು ಕೋಣೆಯಲ್ಲಿ ಕೂರಿಸಿ ಪಾಠ ಹೇಳಿಕೊಟ್ಟಿದ್ದರ ವಿರುದ್ಧ ವಿದ್ಯಾರ್ಥಿಗಳ ಪೋಷಕರು ಪ್ರತಿಭಟನೆ ನಡೆಸಿದ್ದಾರೆ.
ಬೆಂಗಳೂರಿನ ಜೆಪಿ ನಗರದಲ್ಲಿರುವ ಬ್ರಿಗೇಡ್ ಶಾಲೆಯಲ್ಲಿ ಕೈಗೊಳ್ಳಲಾಗಿದ್ದ ಈ ಕ್ರಮ ಈಗ ಹಲವಾರ ಟೀಕೆ, ಆಕ್ಷೇಪಗಳಿಗೆ ಗುರಿಯಾಗಿದೆ.
ಆದರೆ, ಶಾಲೆಯ ಆಡಳಿತ ಮಂಡಳಿ, ಪೋಷಕರ ಈ ಆರೋಪವನ್ನು ತಳ್ಳಿಹಾಕಿದೆ. ಆದರೆ, ಪೋಷಕರ ಪ್ರಕಾರ, ಕಳೆದ ಕೆಲವಾರು ದಿನಗಳಿಂದ ಈ ರೀತಿಯ ಬೇಧ ಆಚರಿಸಲಾಗುತ್ತಿದೆ. ಆದರೆ, ಏನೂ ಅರಿಯದ ಮುಗ್ಧ ಮಕ್ಕಳು ಶಾಲೆಯ ಆಡಳಿತ ವರ್ಗ ಸೂಚಿಸಿದ ಕಡೆ ಕುಳಿತು ಪಾಠ ಕೇಳಿ ಹೋಗಿವೆ. ಆದರೆ, ಬುಧವಾರ ಬೆಳಗ್ಗೆ ಮಕ್ಕಳನ್ನು ಶಾಲೆಗೆ ಬಿಡಲು ಬಂದ ಪೋಷಕರಿಗೆ ಈ ವಿಚಾರ ತಿಳಿದುಬಂದಿದ್ದರಿಂದ ಗಲಾಟೆಯಾಗಿದೆ.
ಇದರಿಂದ ಕೋಪೋದ್ರಿಕ್ತರಾದ ಪೋಷಕರು ಪ್ರತಿಭಟನೆ ನಡೆಸಿ, ಮುಗ್ಧ ಮಕ್ಕಳಲ್ಲಿ 'ಉಳ್ಳವರು, ಬಡವರು' ಎಂಬ ತಾರತಮ್ಯ ತೋರುತ್ತಿರುವುದು ಸರಿಯೇ ಎಂದು ಆಡಳಿತ ಮಂಡಳಿಯನ್ನು ಪ್ರಶ್ನಿಸಿದ್ದಾರೆ. ಈ ಬಗ್ಗೆ ಅಲ್ಲದೆ ಕ್ಷೇತ್ರ ಶಿಕ್ಷಣಾಧಿಕಾರಿಗಳಿಗೆ ದೂರು ನೀಡಲಾಗಿದ್ದು ಕ್ರಮ ಕೈಗೊಳ್ಳುವಂತೆ ಆಗ್ರಹಿಸಲಾಗಿದೆ.