ವಾರ ಭವಿಷ್ಯ : ರಾಶಿಫಲ ಜ.30 ರಿಂದ ಫೆಬ್ರವರಿ 5ರವರೆಗೆ

By: ಪಂಡಿತ್ ವಿಠ್ಠಲ್ ಭಟ್
Subscribe to Oneindia Kannada

ಈ ವಾರ ಜನವರಿ ಜನವರಿ 30ರಿಂದ ಫೆಬ್ರವರಿ 5ರವರೆಗಿನ ಜನ್ಮರಾಶಿಯನ್ನು ಆಧರಿಸಿದ ರಾಶಿಬಲವನ್ನು ನೀಡಲಾಗಿದೆ. ಗೋಚಾರ ಫಲಕ್ಕೆ ಅನುಗುಣವಾಗಿ ಫಲಾನುಫಲ ತಿಳಿದುಕೊಳ್ಳಬಹುದು.[ಕನ್ಯಾ ರಾಶಿಗೆ ಗುರು ಪ್ರವೇಶ : ಯಾವ ರಾಶಿಗೆ ಏನು ಫಲ?]

ಆಸ್ತಿಕರು ತಮ್ಮ ಜನ್ಮರಾಶಿಗೆ ದಿನ ಹೇಗಿದೆ ಎಂದು ತಿಳಿದು ದಿನಚರಿ ಆರಂಭಿಸುವ ವಾಡಿಕೆ ರೂಢಿಸಿಕೊಂಡಿರುತ್ತಾರೆ. ಏಕೆಂದರೆ, ನಿತ್ಯಭವಿಷ್ಯ ಮುಂದಿನ ಘಟನೆಗಳ ಮುನ್ಸೂಚನೆ ನೀಡುತ್ತವೆ. ಪ್ರತಿಯೊಬ್ಬರೂ ನಿತ್ಯ ಒಂದೊಂದು ತರಹ ದಿನ ಕಳೆಯಬೇಕಾಗುತ್ತದೆ. ಇಡೀ ವಾರ ಹೇಗಿರುತ್ತದೆ ಎಂದು ಸೂಚಿಸುವುದೇ ವಾರಭವಿಷ್ಯ.[ಜನ್ಮನಕ್ಷತ್ರದಿಂದ ತಿಳಿಯಿರಿ ನಿಖರವಾದ ಭವಿಷ್ಯ]

ಚಂದ್ರನ ಚಲನೆ ಆಧಾರದಲ್ಲಿ ಹೇಗೆ ನಿತ್ಯಭವಿಷ್ಯವನ್ನು ಕಂಡುಹಿಡಿಯಬಹುದೇ ಅದೇ ರೀತಿ ಇತರ ಗ್ರಹ ಹಾಗೂ ಆಯಾ ವಾರದ ಗ್ರಹ ಬದಲಾವಣೆ ಗಮನಿಸಿ, ಜಾತಕ ರೂಪಿಸಿ ರಾಶಿಬಲ ತಿಳಿಯಬಹುದು. ಆದರೆ ಈ ರೀತಿ ಹೇಳುವ ರಾಶಿಬಲಕ್ಕೆ ಗೋಚಾರ, ದಶಾಭುಕ್ತಿಯ ಫಲ ಅನ್ವಯಿಸುವುದಿಲ್ಲ. [ರಾಹುಕಾಲ, ಗುಳಿಕಕಾಲ, ಯಮಗಂಡಕಾಲ]

ರಾಶಿ ಒಂದೇ ಆಗಿದ್ದರೂ ಕೂಡ ಪ್ರತಿಯೊಬ್ಬರ ಜನ್ಮಜಾತಕದಲ್ಲಿ ದಶಾಭುಕ್ತಿ, ಗ್ರಹಗಳು ಇರುವ ಮನೆಗಳನ್ನು ಆಧರಿಸಿ ರಾಶಿಬಲವನ್ನು ಹೋಲಿಸಿಕೊಳ್ಳಬೇಕು.

ಮೇಷ

ಮೇಷ

ಪುರುಷರು: ನಿಮ್ಮ ಕೈಯಲ್ಲಿ ಹೆಚ್ಚು ದುಡ್ಡು ಹರಿದಾಡುತ್ತದೆ. ಸಾಲ ತೀರಿಸುವ ವಿಚಾರಗಳಿದ್ದಲ್ಲಿ ಸೂಕ್ತ ಸಮಯ. ಅವಿವಾಹಿತರಿಗೆ ವಿವಾಹ ಸಂಬಂಧಗಳು ಕೇಳುತ್ತ ಬರುವ ಸಾಧ್ಯತೆಗಳಿವೆ. ದೂರ ಪ್ರಯಾಣ ಲಾಭ ತರುತ್ತದೆ. ಆರೋಗ್ಯದ ವಿಚಾರದಲ್ಲಿ ಮಾತ್ರ ಎಚ್ಚರಿಕೆ ಅವಶ್ಯ ಇದೆ.

ಕಲೆ ಸಂಗೀತ ಇತ್ಯಾದಿಗಳು ನಿಮ್ಮನ್ನು ಹೆಚ್ಚು ಆಕರ್ಷಿಸುತ್ತವೆ. ಪ್ರೇಮಿಗಳಿಗೆ ಸಂತಸದ ಸಮಯ. ಸಹೋದರ ವರ್ಗದವರೊಂದಿಗೆ ಸ್ವಲ್ಪ ಮನಸ್ತಾಪ ಕಾಡುವ ಸಮಯ. ವ್ಯಾಪಾರಿಗಳಿಗೆ ಲಾಭ ಕಾಣಿಸುತ್ತಿದೆ. ಷೇರು ಮಾರುಕಟ್ಟೆಯಲ್ಲಿ ಹೂಡಿಕೆ ಮಾಡಿದ್ದಲ್ಲಿ ಚಿಂತಿಸುವ ಅವಶ್ಯವಿಲ್ಲ.

ಸ್ತ್ರೀಯರು: ವಿವಾಹಿತರಿಗೆ ತವರು ಮನೆಯಿಂದ ಅತ್ಯುತ್ತಮ ಸಹಕಾರ ಲಭ್ಯವಿದೆ. ತಾಯಿಯ ಸಹಾಯ ಹೆಚ್ಚು ಪಡೆಯುತ್ತೀರಿ.

ವಿದ್ಯಾರ್ಥಿಗಳು: ಪೋಷಕರ ಸಹಾಯ ಸಹಕಾರ ಮಾರ್ಗದರ್ಶನ ಉತ್ತಮವಾಗಿ ಲಭ್ಯವಿದೆ.

ಪರಿಹಾರ: ಪ್ರತೀ ದಿನ ಮನೆಯ ಮುಂದಿರುವ ತುಳಸಿ ಗಿಡದ ಮುಂದೆ ತುಪ್ಪದ ದೀಪ ಹಚ್ಚಿ.

ವೃಷಭ

ವೃಷಭ

ಪುರುಷರು: ವ್ಯಾಪಾರಿಗಳಿಗೆ ನಷ್ಟ ಇದೆ. ಆದರೆ ನಿಮ್ಮ ಶತ್ರುಗಳ ಮುಂದೆ ಜಯ ಇದೆ. ಕೊಟ್ಟ ಮಾತಿನಂತೆ ನಡೆದುಕೊಳ್ಳಲು ಮನಸಿಗೆ ಒಪ್ಪದ ಕೆಲಸ- ಕಾರ್ಯಗಳನ್ನು ಮಾಡಬೇಕಾದೀತು. ಬಾಳಸಂಗಾತಿಯ ವಿಚಾರದಲ್ಲಿ ಬೇಸರ ಅಥವಾ ವಿರಹ ಕಾಡಲಿದೆ.

ಹೊಸ ಖರೀದಿಗಳನ್ನು ಮಾಡಲು ಹಣದ ಕೊರತೆ ಉಂಟಾಗುತ್ತದೆ. ನೀವು ಬಹಳ ಅಭಿಮಾನ ಇಟ್ಟ ವ್ಯಕ್ತಿಗಳಿಂದ ಜೀವನ ಪಾಠ ದೊರೆಯಲಿದೆ. ಪಿತ್ತ ವಿಕೋಪವಾಗಿ ಕೆಲವರಿಗೆ ಆರೋಗ್ಯ ಹಾನಿ ಸಾಧ್ಯತೆಗಳಿವೆ. ವಾರಾಂತ್ಯದಲ್ಲಿ ಸಹಾಯ ಮಾಡಲು ಹೋಗಿ ಸಂಕಷ್ಟಕ್ಕೆ ಸಿಲುಕುತ್ತೀರಿ.

ಸ್ತ್ರೀಯರು: ಸ್ವಲ್ಪ ಆತ್ಮಸ್ಥೈರ್ಯ ಕುಸಿಯಲಿದೆ. ನನ್ನಿಂದ ಸಾಧ್ಯ ಆಗುತ್ತಾ, ನಾನು ಮಾಡುತ್ತೀನಾ ಇತ್ಯಾದಿ ಪ್ರಶ್ನೆಗಳನ್ನು ಕೇಳಿಕೊಳ್ಳುತ್ತೀರಿ.

ವಿದ್ಯಾರ್ಥಿಗಳು: ನಿಮ್ಮ ಶೈಕ್ಷಣಿಕ ಪ್ರಗತಿ ಅಥವಾ ನಿಮಗೆ ವಹಿಸಿದ ಕೆಲಸದ ಫಲಿತಾಂಶ ಪ್ರಾಧ್ಯಾಪಕರಿಗೆ ಸಮಾಧಾನ ತರುವುದಿಲ್ಲ.

ಪರಿಹಾರ: ಪ್ರತೀ ದಿನ ತಪ್ಪದೇ ಶುಕ್ರ ಹಾಗೂ ದುರ್ಗಾ ಅಷ್ಟೋತ್ತರವನ್ನು ಪಠಿಸಿ.

ಮಿಥುನ

ಮಿಥುನ

ಪುರುಷರು: ಕೆಲ ಜಗಳ ಹಾಗೂ ಮನಸ್ತಾಪಗಳು ಕಡಿಮೆ ಆಗಿ ಸ್ನೇಹಭಾವ ಹೆಚ್ಚಲಿದೆ. ಪ್ರೇಮಿಗಳಲ್ಲಿನ ವಿರಸ ಕಡಿಮೆ ಆಗಲಿದೆ. ಸಾಲ ಕೊಡ ಬೇಕಾಗಿಬರಬಹುದು. ನಿಮ್ಮ ಆರ್ಥಿಕ ಸ್ಥಿತಿಗತಿಗಳನ್ನು ಅವಲೋಕಿಸಿ ನಂತರ ಖರ್ಚು ಮಾಡಿ. ಅದೃಷ್ಟದ ಮೇಲೆ ಭಾರ ಹಾಕಿ ಮಾಡುವ ಕೆಲಸಗಳು ಹಣದ ಹೂಡಿಕೆ ಇಲ್ಲದಿದ್ದರೆ ಯಶಸ್ಸು ಕಾಣಬಹುದು.

ಒಂದೊಮ್ಮೆ ಹಣ ಹೂಡಿಕೆ ಮಾಡಿ ಅದೃಷ್ಟ ಪರೀಕ್ಷೆ ಮಾಡಲು ಕುಂತರೆ ಮಾತ್ರ ನಷ್ಟ ನೋಡಬೇಕಾಗಿ ಬರಬಹುದು. ನಿಮ್ಮ ಹಾಸ್ಯಕ್ಕೆ, ಆನಂದಕ್ಕೆ ಮಾತ್ರ ಕೊರತೆ ಬರುವುದಿಲ್ಲ.

ಸ್ತ್ರೀಯರು: ನಿಮ್ಮ ಮಾತಿಗೆ ಮರುಳಾಗುವ ಮಂದಿಯ ಸಂಖ್ಯೆ ನೋಡಿ, ಆಶ್ಚರ್ಯಪಡುತ್ತೀರಿ.

ವಿದ್ಯಾರ್ಥಿಗಳು: ನಿಮ್ಮ ಗಮನ ಯಾವ ವಿಚಾರದಲ್ಲಿ ಇರಬೇಕೋ ಅದನ್ನು ಹೊರತುಪಡಿಸಿ ಅನ್ಯ ವಿಚಾರಗಳತ್ತ ವಾಲುತ್ತದೆ.

ಪರಿಹಾರ: ಪ್ರತೀ ದಿನ ವಿಷ್ಣು ಸಹಸ್ರನಾಮ ಶ್ರವಣ ಮಾಡಿ.

ಕರ್ಕ

ಕರ್ಕ

ಪುರುಷರು: ಪುರುಸೊತ್ತು ಇಲ್ಲದಷ್ಟು ಕೆಲಸ ಮಾಡುತ್ತಿದ್ದರೂ ಅದೆಲ್ಲವನ್ನೂ ಅದೃಷ್ಟದ ಮೇಲೆ ಭಾರ ಹಾಕಿ ಮಾಡಬೇಕಾಗುತ್ತದೆ. ನೀವು ಪಡುತ್ತಿರುವ ಶ್ರಮ ಯಶಸ್ವಿ ಆಗುವುದೋ ಇಲ್ಲವೋ ತಿಳಿಯದ ಸ್ಥಿತಿ. ಕಷ್ಟದ ಸಮಯ ನಡೆಯುತ್ತಿರುವುದು ನಿಮ್ಮ ಗಮನಕ್ಕೆ ಬರುತ್ತದೆ.

ಬಹಳ ಜನರ ನಿಜ ಸ್ವರೂಪ ತಿಳಿಯುತ್ತದೆ. ಆಲಸ್ಯ ನಿಮಗೆ ಅರಿವಿಲ್ಲದೆ ಹೆಚ್ಚಾಗಿ ನಷ್ಟಕ್ಕೆ ದೂಡಬಹುದು. ಚಿಕ್ಕಪುಟ್ಟ ವ್ಯಾಪಾರಿಗಳಿಗೆ ಸಾಲ ದೊರೆಯುತ್ತದೆ. ಸರಕಾರದಿಂದ ಸಹಾಯ ಬೇಕಿದ್ದಲ್ಲಿ ಅದನ್ನು ಮಾಡಿಕೊಡುವ ಜನ ಲಭಿಸುತ್ತಾರೆ.

ಸ್ತ್ರೀಯರು: ತಂದೆಯೊಂದಿಗೆ ಸ್ವಲ್ಪ ಮನಸ್ತಾಪ ಆಗಬಹುದು. ನಿಮ್ಮ ಕೆಲ ನಿರ್ಧಾರಗಳನ್ನು ಅವರು ವಿರೋಧಿಸುತ್ತಾರೆ. ಆತುರದ ನಿರ್ಧಾರಗಳನ್ನು ಸಾಧ್ಯ ಅದಷ್ಟೂ ವರ್ಜಿಸಿ.

ವಿದ್ಯಾರ್ಥಿಗಳು: ಹಸನ್ಮುಖಿ ಆಗಿ ಮುಕ್ತ ಮನಸ್ಸಿನಿಂದ ಉತ್ತಮ ವಿಚಾರಧಾರೆಗಳನ್ನು ಸ್ವೀಕರಿಸುವುದನ್ನು ಕಲಿಯಿರಿ.

ಪರಿಹಾರ: ಪ್ರತೀ ದಿನ ಒಂದು ಹಸುವಿಗೆ ಬಾಳೆ ಹಣ್ಣು ತಿನ್ನಿಸಿ

ಸಿಂಹ

ಸಿಂಹ

ಪುರುಷರು: ನಾಸ್ತಿಕತೆ ಸ್ವಲ್ಪ ಹೆಚ್ಚಾಗಬಹುದು. ಅತ್ಯಂತ ಸನಿಹದವರೊಂದಿಗೆ ಮನಸ್ತಾಪ, ಜಗಳ ಸಹ ಮಾಡುತ್ತೀರಿ. ಶುಭ ಕಾರ್ಯಗಳಿಗೆ ಮಾಡುವ ಓಡಾಟಗಳು ಸ್ವಲ್ಪ ಮುಂದೂಡಲ್ಪಡುತ್ತವೆ. ನೀವು ಮಾಡದ ತಪ್ಪಿಗೆ ನೀವೇ ಹೊಣೆ ಆಗ ಬೇಕಾಗಬಹುದು.

ನಿಮ್ಮ ಅಧಿಕಾರದ ದುರುಪಯೋಗ ಮಾಡಿಕೊಳ್ಳಲು ಕೆಲವರ ಆಗಮನ ಆಗುತ್ತದೆ. ಈ ಹಿಂದೆ ಮುಂದೂಡಲ್ಪಟ್ಟಿದ್ದ ದೂರ ಪ್ರಯಾಣಗಳು ಈಗ ಇದ್ದಕ್ಕಿದ್ದಂತೆ ಅನಿವಾರ್ಯವಾಗಿ ಬರಬಹುದು. ಹಿರಿಯರ ಆಶೀರ್ವಾದ ಹಾಗೂ ಮಾರ್ಗದರ್ಶನವೇ ಸಧ್ಯದ ದೊಡ್ಡ ಆಸ್ತಿ.

ಸ್ತ್ರೀಯರು: ನಿಮ್ಮನ್ನು ಹೊಗಳುವವರ ಸಂಖ್ಯೆ ವೃದ್ದಿಸುತ್ತದೆ. ಪ್ರತಿಯೊಂದು ಹೆಜ್ಜೆಗೂ ಮುನ್ನ ಚಿಂತಿಸಿ.

ವಿದ್ಯಾರ್ಥಿಗಳು: ನಿಮ್ಮ ಕಷ್ಟ ವ್ಯರ್ಥವಾದಂತೆ ಅನಿಸುವ ಕೆಲ ಸಂಗತಿಗಳು ನಡೆಯುತ್ತವೆ. ಆದರೂ ಚಿಂತಿಸದೆ ಶ್ರದ್ಧೆಯಿಂದ ಕಾರ್ಯಗಳಲ್ಲಿ ಮಗ್ನರಾಗಿ.

ಪರಿಹಾರ: ಶನೈಶ್ಚರನ ದೇಗುಲಕ್ಕೆ ಪ್ರತೀ ದಿನ ಹೋಗಿ, ಇಪ್ಪತ್ತೆಂಟು ಪ್ರದಕ್ಷಿಣೆ ಮಾಡಿ ಬನ್ನಿ

ಕನ್ಯಾ

ಕನ್ಯಾ

ಪುರುಷರು: ನೀವು ದೇವತಾ ಆರಾಧನೆಗಳನ್ನು ಮಾಡದೇ ನಾಸ್ತಿಕರಂತೆ ವರ್ತಿಸಿದಲ್ಲಿ ಈ ವಾರವೂ ಪ್ರಮುಖ ಕಾರ್ಯಗಳು ಆಗದು. ಆಲಸ್ಯವನ್ನು ಮೊದಲು ತ್ಯಜಿಸ ಬೇಕು. ಅದರಿಂದಾಗಿ ಹಲವು ಪ್ರಮುಖ ಕಾರ್ಯಗಳಲ್ಲಿ ತೊಡಕು ಉಂಟಾಗುತ್ತಿದೆ.

ಅನಿರೀಕ್ಷಿತ ಉತ್ತಮ ಅವಕಾಶಗಳು ಲಭಿಸುವ ಸಾಧ್ಯತೆಗಳಿವೆ. ಆದರೆ ನಿಮ್ಮ ಅದೃಷ್ಟ ಇನ್ನೂ ಸ್ವಲ್ಪ ವೃದ್ಧಿಸಬೇಕು. ಕಣ್ಣು ಮುಚ್ಚಿ ನೀವು ನಂಬಿದ ಕೆಲವರು ನಿಮಗೆ ಮಾಡಿದ ಮೋಸ ತಿಳಿಯುವ ಸಮಯ. ಮಾತು ಪ್ರಧಾನವಾದ ಉದ್ಯೋಗಿಗಳಿಗೆ ಶುಭವಿದೆ.

ಸ್ತ್ರೀಯರು: ಆಸ್ತಿಗಾಗಿ ಪ್ರಯತ್ನ ಪಡುತ್ತಿದ್ದಲ್ಲಿ ಉನ್ನತ ಅಧಿಕಾರಿಗಳ ಭೇಟಿಯಿಂದ ಕಾರ್ಯ ಸಾಧನೆ ಕಾಣುತ್ತಿದೆ.

ವಿದ್ಯಾರ್ಥಿಗಳು: ದೂರದ ಊರಿಗೆ ಹೋಗಿ ಅಧ್ಯಯನ ಮಾಡಬಯಸುವವರಿಗೆ ಹಲವು ಅವಕಾಶಗಳು ಲಭಿಸಲಿವೆ.

ಪರಿಹಾರ: ಪ್ರತೀ ದಿನ ಗುರು ಗ್ರಹದ ಅಷ್ಟೋತ್ತರ ಪಠಿಸಿ

ತುಲಾ

ತುಲಾ

ಪುರುಷರು: ನಿರುದ್ಯೋಗಿಗಳಿಗೆ ಉದ್ಯೋಗದ ಅವಕಾಶ ಇನ್ನೂ ಇದೆ. ಈ ವಾರವೂ ಕೈಯಲ್ಲಿ ಸ್ವಲ್ಪ ಹಣ ಓಡಾಡುತ್ತದೆ. ಪ್ರೇಮಿಗಳಿಗೆ ಅಷ್ಟು ಉತ್ತಮವಾಗಿ ಕಾಣುತ್ತಿಲ್ಲ. ಈಗ ತಾನೆ ಮದುವೆ ಮಾತುಕತೆ ಯಶಸ್ವಿ ಆಗಿ ಮುಗಿದಿದ್ದಲ್ಲಿ ಎಲ್ಲೂ ಹೇಳಿಕೆ ಮಾತುಗಳಿಗೆ ಕಿವಿ ಕೊಡಬೇಡಿ.

ದೊಡ್ಡ ಪ್ರಮಾಣದ ಹೂಡಿಕೆ ಮಾಡಲು ಶಕ್ತಿ ಬರುತ್ತದೆ. ಆದರೆ ಪರಿಸ್ಥಿತಿಗಳು ಸೂಕ್ತವಾಗಿ ಕಾಣುತ್ತಿಲ್ಲ. ಇನ್ನು ಚಿಕ್ಕ ಸಮಯ ಬೇಕಾಗುವ ಚಿಕ್ಕ ಪ್ರಮಾಣದ ಹೂಡಿಕೆ ಆದಲ್ಲಿ ಒಮ್ಮೆ ನಿಮ್ಮ ಜಾತಕ ಪರಿಶೀಲಿಸಿ, ಒಪ್ಪಿಗೆ ಪಡೆದು ಮಾಡಿ.

ಸ್ತ್ರೀಯರು: ಸೌಂದರ್ಯದ ವಿಚಾರದಲ್ಲಿ ಎಲ್ಲಿಲ್ಲದ ಆಸಕ್ತಿ ಬರುತ್ತದೆ. ಅದರ ನಿಮಿತ್ತ ಖರ್ಚುಗಳು ಸಹ ಹೆಚ್ಚು ಕಾಣುತ್ತಿದೆ.

ವಿದ್ಯಾರ್ಥಿಗಳು: ಭಾಷಾ ಹಾಗೂ ಸಾಂಸ್ಕೃತಿಕ ವಿದ್ಯಾರ್ಥಿಗಳಿಗೆ ಬಹು ಉತ್ತಮ ಸಮಯ.

ಪರಿಹಾರ: ಪ್ರತೀ ದಿನ ದುರ್ಗಾ ದೇಗುಲಕ್ಕೆ ತಪ್ಪದೇ ಹೋಗಿ, ಅಮ್ಮನವರಿಗೆ ಕುಂಕುಮಾರ್ಚನೆ ಮಾಡಿಸಿ

ವೃಶ್ಚಿಕ

ವೃಶ್ಚಿಕ

ಪುರುಷರು: ಕೆಲಸದ ಒತ್ತಡ ಹೆಚ್ಚಾಗುತ್ತದೆ. ಮೈಕೈ ನೋವು ಹೆಚ್ಚು ಇರುತ್ತದೆ. ಮನಸ್ಸು ವಿಶ್ರಾಂತಿಯನ್ನು ಬಯಸುತ್ತದೆ. ದೂರ ಪ್ರಯಾಣ ಮಾಡುವ ಆಸೆ ಇದ್ದರೂ ಅವಕಾಶ ಇದ್ದರೂ ಪ್ರಯಾಣ ಮಾಡಲು ಆಗುವುದಿಲ್ಲ. ಹಣದ ಅವಶ್ಯಕತೆ ಇರುವವರಿಗೆ ಸಾಲ ಎಲ್ಲೂ ಹುಟ್ಟುವುದಿಲ್ಲ.

ಬಾಳ ಸಂಗಾತಿ ಅಥವಾ ನಿಮ್ಮ ಪ್ರೇಯಸಿಯೊಂದಿಗೆ ಜಗಳ ಅಥವಾ ಮನಸ್ತಾಪ ಆಗುವ ಸಾಧ್ಯತೆಗಳಿವೆ. ಸ್ನೇಹಿತರೊಂದಿಗೂ ಭಿನ್ನಾಭಿಪ್ರಾಯ ಕಾಣಿಸುತ್ತಿದೆ. ವ್ಯಾಪಾರಿಗಳಿಗೆ ತೀವ್ರ ನಷ್ಟ ಸಾಧ್ಯತೆ ಇದೆ. ಷೇರು ಮಾರುಕಟ್ಟೆ ಹೂಡಿಕೆ ಪ್ರಮಾದಕರವಾಗಿ ಕಾಣಿಸುತ್ತಿದೆ.

ಸ್ತ್ರೀಯರು: ನ್ಯಾಯಾಲದಲ್ಲಿ ದಾವೆಗಳು ಇದ್ದಲ್ಲಿ ನಿಮ್ಮ ಪರವಾಗಿ ತೀರ್ಮಾನ ಬರುವುದು ಕಷ್ಟ. ಚಿಕ್ಕ ಪುಟ್ಟ ವ್ಯಾಪಾರ ಮಾಡುತ್ತಿರುವವರಿಗೂ ನಷ್ಟ ಇದೆ.

ವಿದ್ಯಾರ್ಥಿಗಳು: ಗಣಿತ ವಿದ್ಯಾರ್ಥಿಗಳಿಗೆ ಕಷ್ಟದ ಸಮಯ.

ಪರಿಹಾರ: ನಿಮಗೆ ಅನುಕೂಲ ಆದ ದಿನ ಕಡಲೆ ಕಾಳು ದಾನ ಮಾಡಿ.

ಧನುಸ್ಸು

ಧನುಸ್ಸು

ಪುರುಷರು: ಮಾನಸಿಕವಾಗಿ ಉತ್ತಮವಾಗಿ ಕಾಣುತ್ತಿಲ್ಲ. ಆದರೆ ಆರೋಗ್ಯದ ದೃಷ್ಟಿಯಿಂದ ನೋಡಿದಾಗ ಸರಿ ಇದೆ ಅನಿಸುತ್ತದೆ. ಒಂದು ಪಕ್ಷ ಅನಾರೋಗ್ಯದಿಂದ ಬಳಲುತ್ತಿದ್ದರೂ ಶೀಘ್ರ ಗುಣಮುಖ ಆಗುವ ಲಕ್ಷಣಗಳಿವೆ. ಒಂದು ವಿಚಾರ ನೆನಪಿಡಿ ಈ ಸಮಾಜದಲ್ಲಿ ಮೋಸ ಹೋಗುವವರು ಇರುವ ತನಕ ಮೋಸ ಮಾಡುವವರೂ ಇರುತ್ತಾರೆ.

ಹಣಕಾಸಿನ ಪರಿಸ್ಥಿತಿ ಉತ್ತಮ ಇರುತ್ತದೆ. ಅವಿವಾಹಿತರಿಗೆ ವಿವಾಹದ ಅವಕಾಶ ಹುಡುಕಿಕೊಂಡು ಬರುತ್ತದೆ. ನಿಮಗೆ ಬುದ್ಧಿ ಮಾತು ಮಾತ್ರ ಕಹಿ ಅನಿಸುವ ಸಮಯ.

ಸ್ತ್ರೀಯರು: ನಿಮ್ಮ ಸ್ನೇಹಿತೆಯರು ದೂರ ಪ್ರಯಾಣಕ್ಕೆ ಕರೆಯಬಹುದು. ವ್ಯರ್ಥ ಮಾತುಗಳಿಂದ ಕಾಲಹರಣ ಮಾಡುತ್ತೀರಿ.

ವಿದ್ಯಾರ್ಥಿಗಳು: ಕೃಷಿ ಹಾಗೂ ವೈದ್ಯ ವಿದ್ಯಾರ್ಥಿಗಳಿಗೆ ಪ್ರಮುಖವಾದ ಸಮಯ. ವೃಥಾ ಆಗದಂತೆ ನೋಡಿಕೊಳ್ಳಿ.

ಪರಿಹಾರ: ಪ್ರತೀ ದಿನ ದತ್ತಾತ್ರೇಯ ವಜ್ರ ಕವಚ ಪಠಿಸಿ.

ಮಕರ

ಮಕರ

ಪುರುಷರು: ಪ್ರಮುಖವಾದ ವಿಚಾರಗಳನ್ನು ಒಂದೋ ಮರೆಯುತ್ತೀರಿ ಅಥವಾ ಅಲ್ಲಗಳೆದು ಪ್ರಾಮುಖ್ಯತೆ ಕೊಡದೆ ನಂತರ ಪರಿತಪಿಸುತ್ತೀರಿ. ಈ ವಾರದಲ್ಲಿ ನೀವು ಕುದಿಯುವ ಎಣ್ಣೆ ಅಥವಾ ಜೋರಾಗಿ ಉರಿಯುವ ಬೆಂಕಿಯಿಂದ ನೆನಪಿಟ್ಟು ದೂರವಿರಿ.

ಕೆಲ ವಿಚಾರಗಳನ್ನು ಮುಂದೆ ಇಟ್ಟುಕೊಂಡು ನಿಮ್ಮನ್ನು ಹೆದರಿಸುವ ಅಥವಾ ನಿಮ್ಮಿಂದ ಕೆಲಸಗಳನ್ನು ಮಾಡಿಸಿಕೊಳ್ಳುವ ಕಾರ್ಯ ನಡೆಯಲಿದೆ. ಉತ್ತಮ ಮಿತ್ರರು ಲಭಿಸುತ್ತಾರೆ. ದೂರ ಪ್ರಯಾಣ ಲಾಭದಾಯಕ ಅಗಿರುತ್ತದೆ. ಮಾತು ಬೆಳ್ಳಿ ಮೌನ ಬಂಗಾರ ನಿಯಮ ಲಾಭದಾಯಕ.

ಸ್ತ್ರೀಯರು: ಶಕ್ತಿಗೂ ಮೀರಿ ನಿಮ್ಮ ಮೇಲೆ ನಿರೀಕ್ಷೆ ಇಡುವುದರಿಂದ ಇತರರಿಗೆ ನಿರಾಸೆಯನ್ನು ನೀಡಲಿದ್ದೀರಿ.

ವಿದ್ಯಾರ್ಥಿಗಳು: ನಿಮ್ಮ ಆತ್ಮವಿಶ್ವಾಸ ಕಡಿಮೆ ಮಾಡಲು ಶತ್ರುಗಳು ಕಾಯುತ್ತಿದ್ದಾರೆ. ಅವರ ಕನಸು ನನಸಾಗಿಸದಿರಿ.

ಪರಿಹಾರ: ಹಸಿರು ವಸ್ತ್ರದಲ್ಲಿ ಹೆಸರು ಕಾಳು ದಾನ ಮಾಡಿ.

ಕುಂಭ

ಕುಂಭ

ಪುರುಷರು: ನಿಮ್ಮ ಶಕ್ತಿಗೂ ಮೀರಿ ಆಸೆ ಪಡುವುದರಿಂದ ದುಃಖ ಕಟ್ಟಿಟ್ಟ ಬುತ್ತಿ. ನಿಮ್ಮಿಂದ ದೈವೀ ಕಾರ್ಯಗಳು ಮಾಡುವ ಸಾಧ್ಯತೆ ಇದೆ. ದೇವರ ಸೇವೆಗಾಗಿ ನಿಮ್ಮಲ್ಲಿ ಯಾರಾದರೂ ಕೇಳಿದರೆ ಇಲ್ಲ, ಆಗಲ್ಲ ಎನ್ನದಿರಿ. ಆರೋಗ್ಯ ವಿಚಾರದಲ್ಲಿ ಎಚ್ಚರ ಅಗತ್ಯ.

ಆಹಾರ ವ್ಯತ್ಯಾಸದಿಂದಾಗಿ ಅಥವಾ ಅಜೀರ್ಣ ಆಗಿ ಹೊಟ್ಟೆ ನೋವು ಬರುವ ಸಾಧ್ಯತೆಗಳಿವೆ. ಬಿಸಿ ಬಿಸಿ ಆಹಾರ ಸೇವಿಸಿ, ತಂಗಳು ವರ್ಜಿಸಿ. ಇತರಿಗೆ ಬಹಳ ಆಸೆ ಹುಟ್ಟಿಸಿ ನಿರಾಸೆಗೊಳಿಸುತ್ತೀರಿ. ಅದನ್ನು ಮೊದಲು ಬಿಡಬೇಕು. ಇಲ್ಲದಿದ್ದರೆ ಸಮಸ್ಯೆ ಆದೀತು.

ಸ್ತ್ರೀಯರು: ಆರೋಗ್ಯ ಸಮಸ್ಯೆ ಸ್ವಲ್ಪ ಕಡಿಮೆ ಆಗಲಿದೆ. ತಲೆ ನೋವು ಹೆಚ್ಚು ಬರುತ್ತಿದ್ದರೆ ಅದೂ ಕಡಿಮೆ ಆಗುತ್ತದೆ.

ವಿದ್ಯಾರ್ಥಿಗಳು: ಅನಿವಾರ್ಯವಾಗಿ ಕೆಲವರನ್ನು ಆಶ್ರಯಿಸಿ, ನಿಮ್ಮ ಕೆಲಸಗಳನ್ನು ಮಾಡಿಕೊಳ್ಳಬೇಕಾಗುತ್ತದೆ.

ಪರಿಹಾರ: ಶಿವನ ದೇಗುಲದಲ್ಲಿ ರುದ್ರಾಭಿಷೇಕ ಮಾಡಿಸಿ

ಮೀನ

ಮೀನ

ಪುರುಷರು: ಮಹತ್ವವಾದ ಕೆಲಸ ಅಥವಾ ತೀರ್ಮಾನಗಳನ್ನು ತೆಗೆದುಕೊಳ್ಳುತ್ತೀರಿ. ಹಣದ ಲೇವಾದೇವಿ ವಿಚಾರದಲ್ಲಿ ಎಚ್ಚರ ವಹಿಸಿ. ನಿಮ್ಮ ಬಳಿ ಯಾರು ಏನೇ ಹೇಳಿದರೂ ಅದು ಸತ್ಯವೇ ಆಗಿರಬೇಕು ಎಂದು ಇಲ್ಲ. ಕಣ್ಣು ಮುಚ್ಚಿ ಜನರನ್ನು ನಂಬುವುದು ಬಿಟ್ಟು ಪರೀಕ್ಷಿಸಿ ಒಪ್ಪಿಕೊಳ್ಳುವುದನ್ನು ರೂಢಿಸಿಕೊಳ್ಳಿ.

ಕುಟುಂಬದ ವಿಚಾರವಾಗಿ ಖರ್ಚುಗಳು ಕಾಣುತ್ತಿವೆ. ಆರ್ಥಿಕವಾಗಿ ಉತ್ತಮ ಸ್ಥಿತಿ ಕಾಣುತ್ತಿದೆ. ಆದರೆ ಕೈಯಲ್ಲಿ ಹೆಚ್ಚು ಹೊತ್ತು ದುಡ್ಡು ನಿಲ್ಲುವುದಿಲ್ಲ. ಮನರಂಜನೆಗಾಗಿ ಸಹ ಖರ್ಚುಗಳು ಕಾಣುತ್ತಿವೆ.

ಸ್ತ್ರೀಯರು: ಅನವಶ್ಯಕ ವಿಚಾರಗಳಿಗೆ ಪ್ರಾಮುಖ್ಯತೆ ಕೊಟ್ಟು ಅತೀ ಪ್ರಮುಖವಾದ ವಿಚಾರಗಳಿಗೆ ಸಮಯ ಇಲ್ಲದ ಹಾಗೆ ಮಾಡಿಕೊಳ್ಳುತ್ತೀರಿ.

ವಿದ್ಯಾರ್ಥಿಗಳು: ನಿಮ್ಮನ್ನು ಅಧ್ಯಾಪಕರು ಗುರುತಿಸಿ ಪ್ರೋತ್ಸಾಹಿಸುವರು. ಆದರೆ ಅದು ಅಹಂ ಆಗಿ ಪರಿವರ್ತನೆಗೊಳ್ಳದಂತೆ ಎಚ್ಚರವಹಿಸಿ.

ಪರಿಹಾರ: ಪ್ರತೀ ದಿನ ತಪ್ಪದೇ ಕೇತು ಗ್ರಹದ ಅಷ್ಟೋತ್ತರ ಪಠಿಸಿ.

English summary
Read your Weekly forecast on the horoscope provided by Oneindia Kannada. We provide online free weekly prediction including your personal, professional and love life.
Please Wait while comments are loading...