ಮೀನ: ಕೆಲಸ -ಕಾರ್ಯಗಳು ನಿಧಾನವಾಗುವ ಸಾಧ್ಯತೆ

Written by: ಪಂಡಿತ್ ವಿಠ್ಠಲ್ ಭಟ್
Subscribe to Oneindia Kannada

ಪುರುಷರು: ತಿಂಗಳ ಆದಿಯಲ್ಲಿ ಶತ್ರುಗಳ ಕೈವಾಡದಿಂದಾಗಿ ಸಹೋದರರ ನಡುವೆ ಸಂಘರ್ಷ. ಭೂಮಿ ಸಂಬಂಧಪಟ್ಟ ವ್ಯಾಪಾರ ವ್ಯವಹಾರ ಹೊರತುಪಡಿಸಿ ಉಳಿದದ್ದರಲ್ಲಿ ಸ್ವಲ್ಪ ನಷ್ಟ ಅಥವಾ ಕೆಲಸ ಕಾರ್ಯಗಳು ನಿಧಾನ. ಇನ್ನು ಕೇವಲ ಭೂಮಿ ವ್ಯಾಪಾರ ಹಾಗೂ ಕಬ್ಬಿಣದ ವ್ಯಾಪಾರಿಗಳಿಗೆ ಉತ್ತಮ ವ್ಯಾಪಾರ ನಿರೀಕ್ಷಿಸಬಹುದು.

ಅದರಲ್ಲಿಯೂ ಕೆಲವರಿಗೆ ವ್ಯಾಪಾರ ಆಗುತ್ತದೆ. ಆದರೆ ಕೈಗೆ ಹಣ ಬರುವುದಿಲ್ಲ. ಸಂಬಂಧಿಕರಲ್ಲಿಯೇ ಹುಡುಕಿದರೆ ವಿವಾಹ ನಿರ್ವಿಘ್ನವಾಗಿ ಕೂಡಿಬರುವುದು. ಮಕ್ಕಳಿಗಾಗಿ ಖರ್ಚುಗಳು ಕಾಣಿಸುತ್ತಿವೆ. ಹಣ ಸ್ವಲ್ಪ ಹೆಚ್ಚು ಖರ್ಚಾಗುವುದು. ಸ್ನೇಹಿತರ ಸಹಾಯ ಮಾತ್ರ ಉತ್ತಮವಾಗಿದೆ.

Pisces monthly horoscope in Kannada for June 2017

ಹೊಸ ವ್ಯಾಪಾರ ಪ್ರಾರಂಭಿಸುತ್ತೀರಿ ಎಂದಾದಲ್ಲಿ ಇನ್ನೂ ಸ್ವಲ್ಪ ದಿನ ಕಾಯಿರಿ. ಕೆಲಸ ಮಾಡಿಕೊಡುವುದಾಗಿ ಯಾರಿಗೂ ಮಾತು ಕೊಡಬೇಡಿ. ನೂತನ ವಾಹನ ಖರೀದಿ ಯೋಗವಿದೆ. ಆದರೆ ಅದಕ್ಕಾಗಿ ಸ್ವಲ್ಪ ಸಾಲ ಆಗುವುದು. ಕೆಲ ರಾಜಕೀಯ ವ್ಯಕ್ತಿಗಳ ಆಶ್ರಯ ಮಾಡಿ ಕಾರ್ಯ ಸಾಧನೆ ಮಾಡಲು ಹೋದಲ್ಲಿ ಮಧ್ಯದಲ್ಲಿಯೇ ನಿಂತು ಹೋಗುವ ಸಾಧ್ಯತೆಗಳಿವೆ.

ಸ್ತ್ರೀಯರು: ಅವಿವಾಹಿತರಿಗೆ ವಿವಾಹಕ್ಕಾಗಿ ಸಹೋರರ ಪರದಾಟ. ಮಾಸಿಕ ಋತು ಚಕ್ರದ ಸಮಸ್ಯೆ ಇದ್ದಲ್ಲಿ ಈ ಸಲ ಅದಕ್ಕೆ ಪರಿಹಾರ ಮಾಡಬಹುದು. ಔಷಧಿ ಕೆಲಸ ಮಾಡುತ್ತದೆ. ಮನೆಯಲ್ಲಿ ಪೂರ್ಣ ಕೆಲಸಗಳ ಜವಾಬ್ದಾರಿ ಬೀಳುತ್ತದೆ. ಸಾರಾಸಗಟಾಗಿ ಯಾರನ್ನೂ ತಿರಸ್ಕರಿಸುವುದು ಕಷ್ಟ.

ಕೆಲ ಪರಿಸ್ಥಿತಿಗಳನ್ನು ಅನಿವಾರ್ಯವಾಗಿ ಎದುರಿಸಲೇ ಬೇಕಾಗುವುದು. ನಿಮ್ಮ ಮೇಲೆ ಚಾಡಿ ಹೇಳಿಕೊಡುವವರ ಸಂಖ್ಯೆ ಹೆಚ್ಚಾದಂತೆ ಭಾಸ ಆದರೂ ಅದು ಪೂರ್ಣ ಸತ್ಯ ಆಗಿರುವುದಿಲ್ಲ. ದ್ವಿಚಕ್ರ ವಾಹನ ಖರೀದಿಸುವ ಆಸೆ ಇದ್ದಲ್ಲಿ ಪ್ರಯತ್ನಿಸಿ, ಬೇಗ ಆಗುತ್ತದೆ.

ಆದರೆ ಕಾರು ಖರೀದಿ ಕಷ್ಟ. ಗೃಹಿಣಿಯರು ಅಡುಗೆ ಮಾಡುವ ವಿಚಾರದಲ್ಲಿ ಉತ್ತಮ ಹೆಸರು ಪಡೆಯುತ್ತಾರೆ. ಆದರೆ ಶುಚಿತ್ವದ ವಿಚಾರ ಬಂದಾಗ ಮಾತ್ರ ಹಿಂದೆ ಆಗಿಬಿಡುತ್ತೀರಿ. ಮಾಸಾಂತ್ಯದಲ್ಲಿ ಸ್ನೇಹಿತ ವರ್ಗದಿಂದ ಹೊಸ ವಸ್ತ್ರ ಉಡುಗೊರೆಯಾಗಿ ಲಭಿಸುವ ಸಾಧ್ಯತೆಗಳಿವೆ.

ವಿದ್ಯಾರ್ಥಿಗಳು: ವಿದ್ಯಾರ್ಜನೆಗಾಗಿ ವಿದೇಶ ಪ್ರಯಾಣ ಸಾಧ್ಯತೆಗಳಿವೆ. ಸರಕಾರಿ ಕಾಗದ ಪತ್ರಗಳು ಸಹ ಗುರುಗಳೊಬ್ಬರ ಸಹಾಯದಿಂದ ಸುಗಮವಾಗುವುದು. ನ್ಯಾಯ ಶಾಸ್ತ್ರ ವಿದ್ಯಾರ್ಥಿಗಳಿಗೆ ಸ್ವಲ್ಪ ಕಠಿಣವಾದ ಸಮಯ ಎಂದು ಕಾಣಿಸುತ್ತಿದೆ. ದೂರ ಪ್ರಯಾಣಗಳಿಗೆ ಬರವಿಲ್ಲ. ಹೊಸ ಸ್ನೇಹಿತರು ಲಭಿಸುತ್ತಾರೆ. ಅವರ ಸಹಾಯ ಸಹಕಾರದಿಂದಲೇ ನಿಮಗೆ ಅರ್ಥವಾಗದ ಬಗೆಹರಿಯದ ಪಠ್ಯ ಪುಸ್ತಕದ ಅಧ್ಯಾಯಗಳು ಕಬ್ಬಿಣದ ಕಡಲೆಯಂತೆ ತೋರುವ ಗಣಿತ ಇತ್ಯಾದಿ ಸುಲಭ ಆಗೋದು.

ಪೋಷಕರ ಸಹಕಾರ ಮಾಸದ ಮಧ್ಯ ಭಾಗದ ನಂತರ ಲಭಿಸುತ್ತದೆ. ಮನಸ್ಸು ಮಾಡಿದರೆ ಈ ಮಾಸದಲ್ಲಿ ಕ್ರೀಡೆಯಲ್ಲಿ ಉತ್ತಮ ಹೆಸರು ಮಾಡಬಹುದು. ಕಾಲೇಜಿನಲ್ಲಿ ನೆರವೇರುವ ಯಾವುದೇ ರಾಜಕೀಯ ವಿಚಾರಗಳಲ್ಲಿ ತಲೆ ಹಾಕಬೇಡಿ.

ಪರಿಹಾರ: ಈ ತಿಂಗಳ ಪ್ರತೀ ಬುಧವಾರದಂದು ಮಹಾವಿಷ್ಣು ದೇಗುಲದಲ್ಲಿ ಸ್ವಾಮಿಗೆ ಪುರುಷಸೂಕ್ತ ಅಭಿಷೇಕ ಮಾಡಿಸಿ. ಹಸಿರು ವಸ್ತ್ರದಲ್ಲಿ ಹೆಸರು ಕಾಳು ದಾನ ಮಾಡಿ.

English summary
Get the complete month predictions of June 2017. Read monthly horoscope of Pisces in Kannada. Get free monthly horoscope, astrology and monthly predictions in Kannada.
Please Wait while comments are loading...