ಜುಲೈ 2017 - ಕ್ಯಾಲೆಂಡರ್ ಮೇಲೆ ತಿಂಗಳ ರಾಶಿ ಭವಿಷ್ಯ

By: ಪಂಡಿತ್ ಅನುಜ್ ಕೆ. ಶುಕ್ಲಾ
Subscribe to Oneindia Kannada

ಜ್ಯೋತಿಷ್ಯ ಕ್ಯಾಲೆಂಡರನ್ನು ಖ್ಯಾತ ಜ್ಯೋತಿಷಿ ಪಂಡಿತ ಅನುಜ್ ಕೆ. ಶುಕ್ಲಾ ಅವರು ಜುಲೈ2017ರ ಪಂಚಾಂಗದ ಆಧಾರದ ಮೇಲೆ ಆಯಾ ರಾಶಿಗೆ ಅನುಗುಣವಾಗಿ ರೂಪಿಸಿದ್ದಾರೆ. ನಿಮ್ಮ ರಾಶಿಗೆ ತಕ್ಕಂತೆ ಅಂದಿನ ದಿನ ನಿಮ್ಮ ಜೀವನದಲ್ಲಿ ಹೇಗಿರುತ್ತದೆ ಎಂಬುದನ್ನು ತಿಳಿದುಕೊಳ್ಳಿ. ಇಂದು ಮಾತ್ರವಲ್ಲ, ನಾಳೆ, ನಾಡಿದ್ದು ಅಥವಾ ಮುಂದಿನ ದಿನ ಹೇಗಿರುತ್ತದೆಂದು ಕೂಡ ಈ ಕ್ಯಾಲೆಂಡರ್ ಮುಖಾಂತರ ತಿಳಿಯಬಹುದು.

ವಾರ ಭವಿಷ್ಯ ಅಥವಾ ತಿಂಗಳ ಭವಿಷ್ಯ ಒಂದು ಬಾರಿ ನೋಡಿ ಮರೆತುಬಿಟ್ಟಿರುತ್ತೇವೆ. ನಾವು ಅವುಗಳನ್ನು ಮರೆತರೂ ಗ್ರಹ, ನಕ್ಷತ್ರ ಮತ್ತು ಕಾಲಚಕ್ರಗಳನ್ನು ನಮ್ಮನ್ನು ಮರೆಯುವುದಿಲ್ಲ. ಭಾರತದ ಪ್ರಾಚೀನ ಜ್ಯೋತಿಷ್ಯಶಾಸ್ತ್ರ ನಮ್ಮ ಜೀವನದೊಂದಿಗೆ ಯಾವತ್ತೂ ಕೂಡಿಕೊಂಡಿರುತ್ತದೆ. ನಿಮ್ಮ ಜೀವನವನ್ನು ಸರಳಗೊಳಿಸುವ ಉದ್ದೇಶದಿಂದ ಜ್ಯೋತಿಷ್ಯ ಕ್ಯಾಲೆಂಡರನ್ನು ಇಲ್ಲಿ ಸಾದರಪಡಿಸುತ್ತಿದ್ದೇವೆ. ನಮ್ಮ ಭವಿಷ್ಯಫಲ ಏನಿದೆ ಎಂದು ಇಲ್ಲಿ ಖುದ್ದಾಗಿ ನಾವೇ ನೋಡಿಕೊಳ್ಳಬಹುದು.

ಚಂದ್ರನ ಚಲನೆಯನ್ನು ಆಧಿರಿಸಿ ರೂಪಿಸಲಾಗಿರುವ ಈ ಕ್ಯಾಲೆಂಡರನ್ನು ನೋಡಿ ಆಯಾ ದಿನ ಪ್ರೇಮ ಪರಿಣಯ ಎಂದು ಹೇಗೆ, ಮನೆ ಕೊಳ್ಳಲು ಯಾವ ದಿನ ಸೂಕ್ತ, ಎಂದು ಧನ ಪ್ರಾಪ್ತಿಯಾಗುತ್ತದೆ, ಯಾವ ದಿನ ಖಿನ್ನತೆ ಆವರಿಸುತ್ತದೆ, ಎಂದು ಸಂತಸದ ಬುಗ್ಗೆ ಉಕ್ಕುತ್ತದೆ ಮುಂತಾದ ವಿಷಯಗಳ ಬಗ್ಗೆ ತಿಳಿಯಬಹುದು. ಎಲ್ಲ ಸಂಗತಿಗಳನ್ನು ಪಂಡಿತರು ವಿವಿಧ ಚಿಹ್ನೆಗಳ ಮುಖಾಂತರ ಅತ್ಯಂತರ ಸರಳವಾಗಿ ತಿಳಿಸಿಕೊಡುತ್ತಾರೆ.

ಯಾವ ಚಿಹ್ನೆ ಏನು ಹೇಳುತ್ತದೆ?

ಹೃದಯ - ಪ್ರೀತಿ ಪ್ರೇಮ ಪ್ರಣಯಕ್ಕೆ ಆ ದಿನ ಅತ್ಯಂತ ಸುದಿನವಾಗಿರುತ್ತದೆ.
ಮಿಂಚು - ಆ ದಿನ ನಿಮ್ಮ ಜೀವನದಲ್ಲಿ ಆಪತ್ತು ಬರಬಹುದು.
ಮನೆ - ಮನೆ ಅಥವಾ ಅಂಗಡಿಯನ್ನು ಆ ದಿನ ಕೊಳ್ಳಬಹುದು ಅಥವಾ ಮಾರಬಹುದು.
ಮುಗುಳ್ನಗೆ - ಆ ದಿನ ನಿಮ್ಮ ಜೀವನದಲ್ಲಿ ಸಂತಸ ಬರಬಹುದು.
ಚಿಂತೆ - ಯಾವುದೋ ವಿಷಯದಲ್ಲಿ ಚಿಂತೆ ಅಥವಾ ಖಿನ್ನತೆ ಆವರಿಸಬಹುದು.
ನಕ್ಷತ್ರ - ಆ ದಿನ ಜೀವನದಲ್ಲಿ ಸೌಭಾಗ್ಯದ ದಿನವಾಗಿರುತ್ತದೆ.
ನಾಣ್ಯ - ನಾಣ್ಯ ಇದ್ದ ದಿನ ಧನ ಲಾಭ ಆಗುವ ಸಂಭವನೀಯತೆ ಇರುತ್ತದೆ.

ಪ್ರತಿದಿನ ಬಿಡುವು ಸಿಕ್ಕಾಗಲೆಲ್ಲ ಈ ಕ್ಯಾಲೆಂಡರನ್ನು ನೋಡಬೇಕೆಂದಿದ್ದರೆ ಈ ಪುಟವನ್ನು ಬುಕ್‌ಮಾರ್ಕ್ ಮಾಡಿಟ್ಟುಕೊಳ್ಳಿ.

ಮೇಷ

ಮೇಷ

ಮೂಗಿನ ನೇರಕ್ಕೆ ಕೋಪ, ಹೇಳಬೇಕಾದ್ದನ್ನು ನಯವಾಗಿ ಹೇಳದಿರುವುದು, ದುಡುಕು ಬುದ್ಧಿ... ನಿಮ್ಮ ಎಲ್ಲ ಉತ್ತಮ ಗುಣಗಳನ್ನು ಗೌಣ ಮಾಡಿಬಿಡುತ್ತದೆ. ಮಾತಿನ ಬಾಣ ಬಿಡುವ ಮುನ್ನ ಅದು ಗುರಿಗೆ ತಾಕುತ್ತದೋ, ಮನಸ್ಸಿಗೆ ಗಾಯ ಮಾಡುತ್ತದೋ ಎಂಬುದನ್ನು ಚಿಂತಿಸಿ ನಂತರ ಬಾಣ ಬಿಡಿ. ಅರ್ಥ ಮಾಡಿಕೊಳ್ಳುವವರಿದ್ದರೆ ಅರ್ಥ ಮಾಡಿಕೊಳ್ಳುತ್ತಾರೆ, ಇಲ್ಲದಿದ್ದರೆ ಅಪಾರ್ಥವಾಗುವುದೇ ಹೆಚ್ಚು. ಎಲ್ಲಕ್ಕಿಂತ ಹೆಚ್ಚಾಗಿ ಅತಿಯಾಸೆ ಗತಿಗೇಡು ಎಂಬ ಗಾದೆ ನಿಮಗೆ ಸದ್ಯದ ಪರಿಸ್ಥಿತಿಯಲ್ಲಿ ಪರ್ಫೆಕ್ಟಾಗಿ ಅನ್ವಯವಾಗುತ್ತದೆ. ನಿಮಗೆ ಏನು ಸೇರಬೇಕೋ ಅದು ಸೇರಿಯೇ ಸೇರುತ್ತದೆ, ಅದಕ್ಕಾಗಿ ಆಸೆಪಡುವ ಅವಶ್ಯಕತೆಯಿಲ್ಲ. ಅನವಶ್ಯಕವಾಗಿ ಕೊರಗುವುದರಿಂದ ನಿಮಗೇ ಹೆಚ್ಚು ಹಾನಿ. ತಾಳ್ಮೆಯಿಂದಿರಿ. ನಿಮ್ಮಲ್ಲಿರುವ ದೌರ್ಬಲ್ಯಗಳನ್ನು ಮೆಟ್ಟಿನಿಲ್ಲಲು ಎಲ್ಲ ಪ್ರಯತ್ನಗಳನ್ನು ಮಾಡಿರಿ. ಆಗ ನೋಡಿ, ನಿಮ್ಮ ವ್ಯಕ್ತಿತ್ವದಲ್ಲಿ ಎಂಥ ಬದಲಾವಣೆ ಬರುತ್ತದೆಂದು.

ವೃಷಭ

ವೃಷಭ

ಸಂದರ್ಭಕ್ಕೆ ತಕ್ಕಂತೆ ಸ್ಟ್ರಾಟಜಿ ಬದಲಿಸಿಕೊಳ್ಳುವ ಚಾಣಾಕ್ಷತೆಯನ್ನು ಕರಗತ ಮಾಡಿಕೊಳ್ಳಿ. ಅವಕಾಶ ಸಿಕ್ಕರೆ ಸಾಕು ಬಲೆಗೆ ಬೀಳಿಸಿಕೊಳ್ಳಲು ಹಲವಾರು ಜನರು ಕಾಯುತ್ತಿರುತ್ತಾರೆ. ಇದಕ್ಕೆ ಅವಕಾಶ ನೀಡದಂತೆ ಯಶಸ್ಸಿನ ಮೆಟ್ಟಿಲನ್ನು ಏರಲು ಏನೇನು ಅವಕಾಶಗಳು ಸಿಗುತ್ತವೋ ಅವನ್ನೆಲ್ಲ ಜಾಗರೂಕತೆಯಿಂದ ಬಳಸಿಕೊಳ್ಳಿ. ಜೀವನ ಯಾವ ಹಂತದಲ್ಲಿ ತಿರುವು ಪಡೆದುಕೊಳ್ಳುತ್ತದೋ ಹೇಳಲು ಬರುವುದಿಲ್ಲ. ಸಣ್ಣಪುಟ್ಟ ಅಡೆತಡೆಗಳಿಗೆ ತಲೆ ಕೆಡಿಸಿಕೊಳ್ಳಲೇಬೇಡಿ. ತಿಂಗಳ ಮಧ್ಯದಲ್ಲಿ ಆರೋಗ್ಯ ಸಮಸ್ಯೆ ಕಾಡಬಹುದು, ಯಾವುದಕ್ಕೂ ಎದುರಿಸಲು ಸಿದ್ಧತೆ ಮಾಡಿಕೊಂಡಿರಿ.

ಮಿಥುನ

ಮಿಥುನ

ಕೆಲಬಾರಿ ಕೆಲವೊಂದು ಋಣಾತ್ಮಕ ಸಂಗತಿಗಳು ನಮ್ಮನ್ನು ಧೃತಿಗೆಡಿಸುತ್ತವೆ, ಕೆಲಬಾರಿ ಅವೇ ಧನಾತ್ಮಕವಾಗಿ ಚಿಂತನೆ ನಡೆಸಲೂ ಕಾರಣವಾಗುತ್ತವೆ. ಅವನ್ನು ನಾವು ಯಾವ ರೀತಿ ಸ್ವೀಕರಿಸುತ್ತೇವೋ ಎಂಬುದರ ಮೇಲೆ ನಿರ್ಧಾರವಾಗುತ್ತದೆ ಮತ್ತು ಜೀವನಪಾಠವನ್ನೂ ಕಲಿಸುತ್ತವೆ. ಗೋಡೆಗೆ ಮೊಳೆ ಹೊಡೆಯುವಾಗ ಸುತ್ತಿಗೆಯಿಂದ ಸರಿಯಾದ ಜಾಗದಲ್ಲಿ, ಸರಿಯಾದ ರೀತಿಯಲ್ಲಿ ಹೊಡೆದಾಗ ಮಾತ್ರ ಒಳಗೆ ಹೋಗುತ್ತದೆ. ಸರಿಯಾದ ಸಮಯದಲ್ಲಿ ನೀವೂ ಎಚ್ಚೆತ್ತುಕೊಳ್ಳಿ. ಏನೇನು ಬದಲಾವಣೆಗಳನ್ನು ಮಾಡಬೇಕೋ ಮಾಡಿಕೊಳ್ಳಿ. ಹಿಂದಿನ ಎಲ್ಲ ಸಂಕಷ್ಟಗಳನ್ನು ಬದಿಗಿಟ್ಟು, ಇಂದಿನ ದಿನದ ಆನಂದವನ್ನು ಪಡೆಯಿರಿ.

ಕರ್ಕಾಟಕ

ಕರ್ಕಾಟಕ

ಸಂಶಯ ಒಳ್ಳೆಯದಲ್ಲವಾದರೂ, ನಮ್ಮ ಸುತ್ತಲಿರುವವರು, ನಮ್ಮನ್ನು ಪ್ರೀತಿಸುವಂತೆ ನಾಟಕವಾಡುವವರು, ಬೆನ್ನ ಹಿಂದೆ ಆಟವಾಡುವವರು ಸಾಚಾಗಳಾ ಎಂದು ಸಂಶಯದಿಂದ ನೋಡುವುದು ಒಳ್ಳೆಯದು. ಬಲವಂತವಾಗಿ ಆತ್ಮೀಯರೊಬ್ಬರು ಸಿಹಿ ತುರುಕಿದ್ದಾರೆಂದರೆ ಅವರು ಸದ್ಬುದ್ಧಿಯಿಂದಲೇ ಹಾಗೆ ಮಾಡಿದ್ದಾರೆಂದು ಏನು ಗ್ಯಾರಂಟಿ? ಕಣ್ಣುಬಿಟ್ಟು ನೋಡುವುದನ್ನು ಕಲಿಯಿರಿ. ಜಗತ್ತು ಹಿಂದಿನಂತಿಲ್ಲ. ಆತ್ಮೀಯತೆಯ ಸೋಗಿನಲ್ಲಿ ಬಂದು ಬೆನ್ನಿಗೆ ಚೂರಿ ಹಾಕುವವರಿದ್ದಾರೆ, ಎಚ್ಚರ. ನಮ್ಮ ಜೀವನವೇ ಒಂದು ರಿಯಾಲಿಟಿ ಶೋ, ನಾವಲ್ಲಿ ಆಟವಾಡುವ ಆಟಗಾರರಷ್ಟೇ.

ಸಿಂಹ

ಸಿಂಹ

ಎಷ್ಟೇ ಮೇಲೇರಿದರೂ ಕೆಳಗಿಳಿಯಲೇಬೇಕು, ಎಷ್ಟೇ ದೂರ ಕ್ರಮಿಸಿದರೂ ಮೊದಲಿದ್ದ ಜಾಗಕ್ಕೆ ಮತ್ತೆ ಮರಳಲೇಬೇಕು. ಈ ಕವಿವಾಣಿ ಜೀವನಾನುಭವದಿಂದ ಬಂದ ಮಾತು. ಹೀಗಂತ ಮಾತ್ರಕ್ಕೆ ನಾವು ಸೋತಿದ್ದೇವೆಂದಲ್ಲ. ಬದಲಿಗೆ, ನಮ್ಮನ್ನು ನಾವು ವಿಮರ್ಶಿಸಿಕೊಳ್ಳುವ, ಬಂದ ದಾರಿಯನ್ನು ಅವಲೋಕಿಸುವ ಒಂದು ಅವಕಾಶ. ಏನೇ ಕೆಲಸ ಮಾಡಿರಿ, ಆದರೆ, ಅದರಲ್ಲಿ ನಿಮ್ಮತನವಿರಬೇಕು. ಉಳಿದವರಿಂದ ಮಾಡಿಸಿಕೊಂಡು ನಿಮ್ಮ ಸ್ಟಾಂಪ್ ಒತ್ತುವ ಬುದ್ಧಿಯಿರಬಾರದು. ಇದಕ್ಕೆ ಪ್ರತಿಯಾಗಿ, ಯಾವುದೇ ಪ್ರತಿಫಲಾಪೇಕ್ಷೆಯಿಲ್ಲದೆ ಇತರರ ಕೆಲಸ ಮಾಡುವ ದೊಡ್ಡಗುಣವೂ ಇರಬೇಕು. ಪ್ರತಿಫಲ ಸಿಕ್ಕೇಸಿಗುತ್ತದೆ, ನಿರೀಕ್ಷೆಯಿರಲಿ, ತಾಳ್ಮೆಯಿರಲಿ.

ಕನ್ಯಾ

ಕನ್ಯಾ

ದೈನಂದಿನ ವ್ಯಾಪಾರ, ಕಾಸು ಮಾಡಲು ಕಸರತ್ತು, ಏನೇನೋ ಸಾಧಿಸುವ ಕನಸುಗಳನ್ನೆಲ್ಲ ಬದಿಗಿಟ್ಟು ಚಿಕ್ಕ ಮಗುವಂತಾದರೆ ಹೇಗೆ ಎಂದು ಕಲ್ಪಿಸಿಕೊಳ್ಳಿ. ಚಿಕ್ಕಮಗುವಾಗೇಬಿಡಿ. ನಂತರ ನೋಡಿ ಹೇಗೆ ಬದಲಾಗುತ್ತದೆ ನಿಮ್ಮ ಜೀವನದ ದೃಷ್ಟಿಕೋನ, ದಿಕ್ಕುದೆಸೆ. ಬಣ್ಣಗಳನ್ನು ಹುಡುಕಿ ಹೊರಡಿ, ಆದರೆ ಎತ್ತ ಹೋಗುತ್ತಿದ್ದೀರೆಂದು ಗಮನವಿರಲಿ. ಪ್ಲಾನಿಂಗು, ಯೋಜನೆ ಮಣ್ಣುಮಸಿ ಯಾವುದೂ ಬೇಡ, ಆದರೆ ಹಿಡಿದ ಕೆಲಸವನ್ನು ಪೂರೈಸುತ್ತೇನೆಂಬ ಛಲವಿರಲಿ. ಇದೊಂದು ಪ್ರಯೋಗ ಮಾತ್ರ. ಇದರಲ್ಲಿ ನೀವು ಯಶಸ್ವಿಯೂ ಆಗಬಹುದು, ಪ್ರಯತ್ನಗಳು ವಿಫಲವೂ ಆಗಬಹುದು. ತಪ್ಪೇನಿಲ್ಲ ತಾನೆ?

ತುಲಾ

ತುಲಾ

ಹಲವು ಜನರಿಗೆ ತಾವು ಸಮಾಜಕ್ಕೆ ನೀಡುತ್ತಿರುವ ಕಾಣಿಕೆ, ಕೆಲಸದಲ್ಲಿ ತೋರುತ್ತಿರುವ ಸಾಮರ್ಥ್ಯದ ಬಗ್ಗೆ ಅರಿವಿರುವುದಿಲ್ಲ. ಅಂಥವರಲ್ಲಿ ನೀವೂ ಒಬ್ಬರು. ಕೆಲಬಾರಿ ನಮಗೆ ಇಷ್ಟವಿಲ್ಲದಿದ್ದರೂ ನಮ್ಮನ್ನು ನಾವು ತೋರ್ಪಡಿಸಿಕೊಳ್ಳಬೇಕಾಗುತ್ತದೆ. ನಿಮಗೇನು ಬೇಕು ಅದನ್ನು ನಿರ್ಭಯವಾಗಿ ಕೇಳಿರಿ, ಉದ್ಯೋಗದಲ್ಲೇ ಇರಲಿ ಮನೆಯಲ್ಲೇ ಇರಲಿ. ಬೆವರು ಸುರಿಸಿ ದುಡಿದ ಪ್ರತಿಯೊಂದು ಘಳಿಗೆಗೂ, ಅದರ ಪ್ರತಿಫಲಕ್ಕೂ ನೀವು ಹಕ್ಕುದಾರರು. ಆದರೆ, ಅಹಂಕಾರದ ಗಡಿ ಮೀರದಂತೆ ವರ್ತಿಸುವುದು ಹಿತ. ಹಿತ ಮತ್ತು ಅಹಿತದ ನಡುವಿನ ಗೆರೆ ತುಂಬಾ ತೆಳುವಾಗಿದೆ.

ವೃಶ್ಚಿಕ

ವೃಶ್ಚಿಕ

ಹೆಗಲ ಮೇಲೆ ಒಂದೊಂದೇ ನಿರೀಕ್ಷೆಯ ಬಂಡೆಗಲ್ಲು ಹೇರಲಾಗುತ್ತಿದ್ದಂತೆ, ಹೊತ್ತು ಗುರಿ ಸಾಧಿಸಿ ಮತ್ತೊಂದನ್ನು ಹೆಗಲೇರಿಸುವ ತಾದಾತ್ಮ್ಯತೆ ನಿಮ್ಮಲ್ಲಿದ್ದರೆ ನೀವು ಪ್ರತಿಯೊಂದು ಪರೀಕ್ಷೆಯಲ್ಲಿಯೂ ಗೆಲ್ಲುತ್ತೀರಿ. ಇಲ್ಲದಿದ್ದರೆ ಸೋಲು ಮತ್ತು ನಿರಾಶೆ ಕಟ್ಟಿಟ್ಟ ಬುತ್ತಿ. ಆತ್ಮವಿಶ್ವಾಸವಿರಲಿ, ಅತಿಯಾದ ಆತ್ಮವಿಶ್ವಾಸದಿಂದ ಗುರಿ ಸಾಧಿಸುವ ಛಲವನ್ನೇ ಕಳೆದುಕೊಳ್ಳುತ್ತೀರಿ. ಇದು ನಿಮಗೆ ಕತ್ತಿಯ ಮೇಲಿನ ನಡಿಗೆಯಿದ್ದಂತೆ, ಹಗ್ಗದ ಮೇಲಿನ ಸರ್ಕಸ್ ಇದ್ದಂತೆ. ಶೈಕ್ಷಣಿಕ ರಂಗದಲ್ಲಿ, ವೃತ್ತಿಯಲ್ಲಿ ಹೇಗೆ ಉನ್ನತಿ ಸಾಧಿಸಲು ಬಯಸುತ್ತೀರೋ, ಹಾಗೆಯೆ ವೈಯಕ್ತಿಕ ಬದುಕಿನಲ್ಲಿಯೂ ಎಲ್ಲ ಮೆಚ್ಚುಗೆ ಗಳಿಸಲು ನಿಮ್ಮ ಯತ್ನವಿರಲಿ. ನೀರಿನಲ್ಲಿ ಹೋಮ ಮಾಡಿತಂತೆ ಆಗಬಾರದಂತೆ ಎಚ್ಚರ ವಹಿಸಿ.

ಧನುಸ್ಸು

ಧನುಸ್ಸು

ಸೌಂದರ್ಯವನ್ನು ಹೊಗಳುವುದು, ಅಡುಗೆ ರುಚಿಯಾಗಿದೆಯೆಂದು ಬಣ್ಣಿಸುವುದು, ಮಲ್ಲಿಗೆ ಹೂತಂದು ಪ್ರೀತಿ ವ್ಯಕ್ತಪಡಿಸುವುದು, ಬೇಡಿಕೆಗಳಿಗೆ ಸ್ಪಂದಿಸುವುದು... ಇವೆಲ್ಲ ಜೀವನದ ಒಂದು ಭಾಗವೆ. ಜೀವನವೇ ಒಂದು ನಾಟಕವಾದರೂ, ನಾವು ಪಾತ್ರಧಾರಿಗಳಾದರೂ, ಆಡುತ್ತಿರುವುದು ನಾಟಕವೇ ಆಗಬೇಕಂತೇನಿಲ್ಲ. ಆದರೆ, ಅಗತ್ಯ ಬಿದ್ದರೆ ನಾಟಕವಾಡಲೂ ನಮ್ಮವರಿಗಾಗಿ ನಾವು ನಾಟಕವಾಡಲೂ ಸಿದ್ಧರಿರಬೇಕು. ಇದುವೇ ಜೀವನದ ಧರ್ಮ. ಇದರಲ್ಲಿ ಯಶಸ್ಸು ಪಡೆದರೆ, ಅರ್ಧ ಯುದ್ಧ ಗೆದ್ದಂತೆ. ಸೋಲು ಗೆಲುವು ಎರಡನ್ನೂ ಸಮನಾಗಿ ಸ್ವೀಕರಿಸುವುದನ್ನು ಕಲಿಯಿರಿ. ಗೆದ್ದಾಗ ಹಾರಾಡುವುದು, ಸೋತಾಗಎಗರಾಡುವುದು ಸರ್ವಥಾ ಸಲ್ಲದು. ನಿಮ್ಮ ಹತ್ತಿರದವರ ಮುಂದೆ ನೀವು ಹೀರೋ ರೀತಿಯಲ್ಲಿ ಕಾಣಿಸಬೇಕಾದರೆ, ಅವರು ನಿಮ್ಮನ್ನು ಆರೀತಿ ಪರಿಗಣಿಸಬೇಕಾದರೆ ನೀವು ಸಾಕಷ್ಟು ಪ್ರಯತ್ನ ಪಡಬೇಕು.

ಮಕರ

ಮಕರ

ನಿಮ್ಮನ್ನು ಕಂಡರಾಗದವರು, ನಿಮ್ಮ ಶ್ರೇಯಸ್ಸನ್ನು ಬಯಸದವರು ನಿಮ್ಮನ್ನು ಅಡ್ಡದಾರಿಗೆ ಎಳೆಯಲು ಯತ್ನಿಸುತ್ತಲೇ ಇರುತ್ತಾರೆ. ಯಾವುದೇ ಕಾರಣಕ್ಕೂ ಅನಪೇಕ್ಷಿತ ಆಮಿಷಕ್ಕೊಳಗಾಗಿ ನಿಮ್ಮತನವನ್ನು ಕಳೆದುಕೊಳ್ಳಬೇಡಿ. ಹೂವು ಮಧುವನ್ನು ತುಂಬಿಕೊಂಡಾಗಲೇ ದುಂಬಿಯನ್ನು ಸೆಳೆಯುವುದು ಸಹಜ. ಕೆಲವರು ನಿಮ್ಮಲ್ಲಿನ ಅಂತಃಶಕ್ತಿಯನ್ನು ಬರಿದು ಮಾಡಿ ಬೀದಿಪಾಲು ಮಾಡಿದರೂ ಅಚ್ಚರಿಯಿಲ್ಲ. ಅಂಥವರು ಬಂದಾಗ ಸುಮ್ಮನೆ ಒಂದುಬಾರಿ ನಕ್ಕು ಪಕ್ಕಕ್ಕೆ ತಳ್ಳಿಬಿಡಿ.

ಕುಂಭ

ಕುಂಭ

ನನಗಿಂತ ಜಾಣರಿಲ್ಲ ಎಂಬ ಅಹಮಿಕೆಯನ್ನು ಬಿಟ್ಟು ಎಲ್ಲವನ್ನೂ ಸಮಾನವಾಗಿ ಸ್ವೀಕರಿಸುವ ಸ್ಥಿತಪ್ರಜ್ಞತೆಯನ್ನು ಬೆಳೆಸಿಕೊಳ್ಳಿ. ಮುಂಬರುವ ಅನೇಕ ಅಡೆತಡೆಗಳನ್ನು ಎದುರಿಸಲು ಇಂಥ ಸ್ಥಿತಪ್ರಜ್ಞತೆ ಬೇಕಾದೀತು. ನೀವು ಎಷ್ಟೇ ಜಾಣರಾಗಿದ್ದರೂ, ಎಷ್ಟೇ ಪ್ರತಿಭಾನ್ವಿತರಾಗಿದ್ದರೂ ಎಲ್ಲವನ್ನೂ ಸೋಲಿಸುವ ಶಕ್ತಿ ನಿಮ್ಮಲ್ಲಿಯೇ ಇರುತ್ತದೆ. ಬಾಹ್ಯಜಗತ್ತಿನೊಂದಿಗಲ್ಲ, ನಿಮ್ಮನ್ನೇ ಸೋಲಿಸುವ ಆ ಆಂತರಿಕ ಶಕ್ತಿಯೊಂದಿಗೆ ನೀವು ಹೋರಾಟ ಮಾಡಿ ಗೆಲ್ಲಬೇಕು. ಆ ಛಲ, ಆ ಏಕಾಗ್ರತೆ ನಿಮ್ಮಲ್ಲಿದೆಯೆ? ಆ ಅಹಂಕಾರ ನಿಮ್ಮಲ್ಲಿದ್ದರೆ ಹೋರಾಡಿ ಅಥವಾ ದುರಹಂಕಾರವಿದ್ದರೆ ಸೋಲನ್ನು ಸ್ವೀಕರಿಸಿ.

ಮೀನ

ಮೀನ

ಎಲ್ಲವೂ ಸರಿಹೋದಾಗ ಅಶ್ವಿನಿ ದೇವತೆಗಳು ಅಸ್ತುಅಸ್ತು ಅನ್ನುತ್ತಿರುತ್ತಾರಂತೆ. ಅದೇ ರೀತಿ ನಿಮ್ಮ ಜೀವನದಲ್ಲೂ ಮಧುಮಾಸ ಆರಂಭವಾಗಿದೆ. ಕೈಯಿಟ್ಟಿದ್ದೆಲ್ಲ ಚಿನ್ನವಾಗದಿದ್ದರೂ, ಕೈಯಿಟ್ಟ ಕೆಲಸವೆಲ್ಲ ಸರಾಗವಾಗಿ ಆಗುತ್ತಿರುತ್ತದೆ. ಇದನ್ನು ಧನಾತ್ಮಕವಾಗಿ ಬಳಸಿಕೊಂಡು ಹೆಚ್ಚು ಕೆಲಸ ಮಾಡಲು ಆರಂಭಿಸಿ. ಜೀವನವೆಂಬುದು ಹೂವಿನ ಹಾಸಿಗೆಯಂತಲ್ಲ, ಮುಳ್ಳುಗಳು ಚುಚ್ಚುತ್ತಲೇ ಇರುತ್ತವೆ. ಆದರೆ, ಕಬ್ಬಿಣ ಕಾದಾಗಲೇ ಬಡಿಯಬೇಕು.

7 Days in a week : Each Day Indicates Characteristics Of That Particular Person | Oneindia Kannada
English summary
The calendars specially designed by astrologer Pandit Anuj K. Shukla shows days when the Moon, Sun, and planets favour particular zodiac sign. Astro Calendar for Aries, Taurus, Gemini, Cancer, Leo, Virgo, Libra, Scorpio, Sagittarius, Capricorn, Aquarius and Pisces.
Please Wait while comments are loading...